स्पेन स्वीडेनयात २–१ गोलं बुकाः मिस्तय् विश्वकप फुटबलया फाइनलय् दुहां वंगु दु ।

कासा क्वचायेत छगू मिनेट ल्यं दनिबलय् याःगु गोलया ग्वाहालिं स्पेन विश्वकपया फाइनलय् दुहां वंगु थ्व हे न्हापांखुसी खः ।

न्यूजिल्यान्डया अक्ल्यान्डय् जूगु नाटकीय कासाय् अन्तिम झिगू मिनेट दुने जूगु स्वंगू गोलं कासाया निर्णय जूगु खः । कासाया ८० मिनेट तक निगुलिं टिमं गोल यायेमफयाच्वंगु इलय् ८१ गु मिनेटय् सब्स्टिच्यूट कासामि साल्मा पारालुइलों गोल यासें स्पेनयात न्ह्यने यकूगु खः।

कासा क्वचायेत ९३ सेकेन्ड ल्यं दनिबलय् स्वीडेनया रेबेका ब्लोम्क्वेस्टं गोल यासें कासा बराबरीइ हःगु खः ।थ्व इलय् कासा थप इलय् वनीगु खनेदुगु खः । तर थ्व गोल जूगु छगू मिनेट हे मजानीवं कप्तान ओल्गा कारमोनां गोल यासें स्पेनयात न्हापांखुसी विश्वकपया फाइनलय् यंकीगु लुखा चायेकाबिउगु खः ।

स्पेनं आः इंग्ल्यान्ड व अस्ट्रेलिया दथुया सेमिफाइनल कासाय् त्याःगु देय्लिसे आइतवाः सिडनीइ फाइनल कासा म्हिती ।

Categorized in कासा