बुद्धचित्तया उपद्रव
आर. मानन्धर | चौलाथ्व अष्टमी ११४४, बैसाख ४ मंगलवाः
बोधिसत्वं पित
थःगु हे नुगःदुने — बुद्धचित्तया पुसा
बुद्धचित्त सयेकेत वं सकतां त्याग यात
तपस्या यानाः वं धात्थें सयेकल — थःदुने
अमूल्यगु बोधिचित्त !
थौं मनूतय्सं बुद्धचित्तया नामय्
लोभया सिमा पिनाच्वन
मूवंगु सिमाया रक्षार्थ
थुवालं थःगु ज्यान पानाच्वन
हानं, डाँकातय्सं ज्यानया बाजि तयाः
बुद्धचित्त लुटे यायेत स्वयाच्वन
चित्तया वास्तातकं मतइपिं कम्यूनिष्टतय् नं
बुद्धचित्तय् मिखा वनाच्वन
अले साम्यवाद हये निम्तिं धकाः
माक्र्सं ज्वंकूगु बम
बोधिचित्त कब्जा याये निम्तिं मुइकाच्वन !
हे बुद्ध
थौं मनूतय्सं
छंगु बुद्धचित्त सिमां
राग, द्वैष व भयया फल सयेकाच्वन
छं क्यनाथकूगु बुद्धचित्तय्
ज्वाँय् ज्वाँय् धेबा सयाच्वंगु खंकाच्वन !
छ बुद्ध जुयेवं
थ्व सुनां नं थुइके मफइगु ज्ञान धकाः
गुलिखे वाः छ मौन च्वंगु खः
धात्थें, छं बेकारय् हे धर्मया उपदेश बियावन
थन छंगु नामय् मनूतय्सं तसकं उपद्रव यानाच्वन
छंगु धर्मया नामय् गजब गजबगु अनर्थ जुयाच्वन !
