२०८० चैत्र १५, बिहिबार

‘ट्रम्पयात समर्थन लित का’

लहनान्यूज सम्वाददाता | कौलाथ्व एकादशि ११३६ (अक्टोबर १२ २०१६)

संयुक्त राज्य अमेरीकाया वर्तमान राष्ट्रपति बाराक ओबामां न्हूम्ह राष्ट्रपतिया प्रत्याशी डोनाल्ड ट्रम्पयात समर्थन लित कायेत रीपब्लिकन पार्टिया नेतातयत इनाप याःगु दु ।
 
ओबामां रीपब्लिकन पार्टियापाखें अमेरीकाया राष्ट्रपतिया उम्मेदवार ट्रम्पप्रति समर्थन लित कायेत छाय् लिचिलाच्वन धइगु खँ थम्हं मथूगु धाःगु खः । ओबामां रिपब्लिकन पार्टिं ट्रम्पप्रति समर्थन औपचारीक रुपं हे लित कया छ्वये माःगु धाःगु खः ।
 
ट्रम्पं मिसातयत कयाः आपत्तीजनक खँत नवानातःगु सन् २००५या भिडियो सार्वजनिक जुइधुंकाः वयकःया प्यखेरं आलोचना जुयाच्वंगु दु । थुकिया झ्वलय् मेमेगु पार्टिया लिसें रिपब्लिकन पार्टिया गुलिखे नेतातयसं नं ट्रम्पया आलोचना यानाच्वंगु दु ।
 
तर ट्रम्प व वयकःया समर्थकतयसं धाःसा थुकथंया विरोध थःपिनिगु नितिं न्हूगु खँ मखूगु धाःगु दु । थज्याःगु विरोधं थःपिं लिमचिलेगु नं ट्रम्पं धायेधुंकूगु दु । 
Categorized in अन्तर्राष्ट्रिय