अधिकार कायेत मिस्त थः हे न्ह्यज्यायेमा – उपमेयर हरिप्रभा
लहनान्युज | चौलाथ्व चतुर्दशी ११४१,बैसाख १३ सोमवाः
येँ महानगरपालिकाया उपमेयर हरिप्रभा खड्गी श्रेष्ठं ‘मिस्त थः हे न्ह्यज्यानाः अधिकार कायेमा’ धयादिल । अझं राज्यनाप समान अधिकारया नितिं द्वन्द क्वमचाःनि धासें ‘उतिग्यंक अधिकार मवःतले थुगु संघर्ष दिकेमज्यू’ धयादिल ।
कोभिड–१९ सचेतनाया तातुनां मंगलादेवी स्मृति प्रतिष्ठानं ग्वसाः ग्वःगु छवाःया नेतृत्व विकास तालिमया समापन समारोहय् मूपाहाँ उपमेयर श्रेष्ठं ब्वति कयादीपिन्त दसिपौ लःल्हानादिसें नेतृत्व विकास तालिमया छवाःया इलय् खंगु ह्यूपापाखें थःगु मन लय्ताःगु खँ न्ह्यथनादिल । वय्कलं तालिमय् ब्वति कयादीपिं सकलसित भिंतुना देछाःसें ‘शुभकामना भरी हरेक शब्दमा...’ म्ये नं न्यंकादीगु खः ।
मंगलादेवी सिँहयात लुमंकूसें न्ह्याःगु थुगु ज्याझ्वः प्रतिष्ठानया नायः गंगालक्ष्मी अवालया सभापतित्वय् जूगु खः । सभानायः अवालं तालिमय् ब्वति कयादीपिं सकलसित भिंतुना देछाःसें थजाःगु तालिम निरन्तर यानावं वनेगु खँ तयादिलसा ग्वाहालि यानादीपिन्त सुभाय् नं देछानादिल । विशेष पाहाँ काठमाडौं महानगरपालिका सामाजिक विकास विभाग प्रमुख दिपक अधिकारीं मय्जुपिनिगु क्षमता अभिबृद्धिइ महानगरपालिकां थीथी योजना व ज्याझ्वःत दयेकाच्वंगु जानकारी बियादिल । तालिमया उपलब्धिं थः अतिकं लय्तायागु खँ नं वय्कलं कनादिल ।
तालिम स्यानामि सुरजवीर बज्राचार्यं ब्वति कयादीपिनिगु सक्रियता व चान्हि मधाःसे यानादीगु मेहेनतं थः अतिकं प्रभावित जुयागु खँ कयादिल । थीथी अभ्यासय् खनेदुगु मेहेनत ‘छगू परम्पराकथं’ विकास जुइमा धयादिसें जीवनय् वइगु प्रत्येक ह्वःताया उपयोग यायेत व मालीबलय् थः सदां नं ग्वाहालि यायेत दयाच्वनी धकाः प्रतिवद्धता प्वंकादिल ।
तालिम ज्याझ्वःया कजि आनन्दरत्न बज्राचार्यं मय्जुपिं नेतृत्वय् थ्यंगु स्वयेगु समाजया मती दःसा न्ह्यज्यायेत पलाः मन्ह्यापिं मय्जुपिनिगु नितिं तालिम माःगु खँ कनादिल । मेखे न्ह्यां वनेगु मन, ज्ञान व सीप विकास जुयाः नं ह्वःता व हःपा मदइगु हुनिं नं मय्जुपिं न्ह्यज्याय् मफुुगु खः धयादिल ।
ज्याझ्वलय् स्यनामि सुरजवीर बज्राचार्य, तालिम संयोजक आनन्दरत्न बज्राचार्य व येँ महानगरपालिका सामाजिक विकास विभाग प्रमुख दिपक अधिकारीयात कदरपत्र लःल्हाःगु खःसा तालिमय् ब्वति कयादीपिं सकसिया ल्हाःचिं दुगु सुभाय् पौ मूपाहाँ हरिप्रभा खड्गी श्रेष्ठ व ग्वसाः खलः प्रतिष्ठानया नायः गंगालक्ष्मी अवालयात लःल्हाःगु खः ।
प्रविणा श्रेष्ठं न्ह्याकादीगु ज्याझ्वलय् लसकुस न्वचु लोकंह्वाःम्ह म्येहालामि सरीता शाहीं बियादीगु खः । येँ महानगरपालिकाया ग्वाहालिइ जन चिकित्सालय न्ह्योखाय् जूगु तालिमय् २९ म्हसिनं ब्वति कयादीगु खः ।
ज्याझ्वलय् तालिमय् ब्वति कयादीपिं कलाकारपिं अगिना तण्डुकार, सविना मानन्धर व सरीता शाहीं म्ये नं न्यंकादीगु खः ।
