अप्वया वनाच्वंगु बस दुर्घटना
थौंकन्हय् न्हियांन्हिथं न्यने दयाच्वंगु बुखँया विषय खः, दुर्घटना । अझ उकिं नं अप्वः धइथें बस दुर्घटना हे खः धाःसां पाइमखु । खय्त ला दुर्घटना म्हो याय्गु धइगु मनूतय्गु हे ल्हातिइ खः । तर अप्वया वनाच्वंगु बस दुर्घटनां यानाः थुकिं मनूतय्गु ज्यान गुलि जोखिमय् लानाच्वंगु दु धइगु यच्चुक क्यनाच्वंगु दु ।
 
 
 
नकतिनि हे दोलखां वयाच्वंगु बस सिन्धुपाल्चोकया सुकुटेय् बस दुर्घटना जूगु इलय् म्होतिं १७म्ह सित । अथे हे, म्याग्दीइ बस दुर्घटना जुयाः प्यम्ह सित । डोटीइ महाकाली बस दुर्घटना जूगु इलय् छम्ह सित, आपालं घाःपाः जुल । सिन्धुपाल्चोकं वःगु बस येँया सक्वय् दुर्घटना जूगु इलय् स्वम्ह सित, न्यय्म्हं मल्याक घाःपा जुल... .. थजाःगु हे दुर्घटना न्हियांन्हिथं अप्वया वनाच्वंगु दु ।
 
 
विशेष यानाः मोहनि व स्वन्ति हनेत स्वनिगलं पिहां वनीगु बस व नखः हनेधुंकाः लिहां वइगु बस अप्वः यानाः दुर्घटनाया बुखँ जुइगु यानाच्वंगु दु । खय्त ला थजाःगु दुर्घटना जुयाच्वंसां नं अप्वः धइथे थुगु इलय् जुयाच्वंगु झीसं न्यनाच्वनागु दु, खनाच्वनागु दु । दँय्दसं थुकथंया दुर्घटना म्हो जुजुं वनेगु स्वयां झन् झन् अप्वया वनाच्वंगु दु धाःसां पाइमखु । गुलिखे दुर्घटना पहाडी लागाय् जुयाच्वंगु दुसा तराई लागाय् नं उलि हे दुर्घटना जुयाच्वंगु खनेदु । न्ह्याथाय् जुइमाः, दुर्घटना म्हो जुइगु पलेसा अझ अप्वया वनाच्वंगु दु ।
 
 
न्हापा दुर्घटना अप्वः धइथें मादक पदार्थ सेवन यानाः जुइगुलिं खः । तर नेपाल सरकारं मापसे सेवन याःपिन्त कारवाही याःगु हुनिं दुर्घटना म्हो जूगु खःसा लिपांगु इलय् गाँजा सेवन यानाः नं सवारी साधन चले याःगुलिं दुर्घटना अप्वःगु धइगु खँ पिहां वय्वं प्रहरीं गाँजा त्वनाः सवारी साधन चले याइपिन्त नं कारवाही याय्गु अभियान न्ह्याकूगु खः । तर थ्व ज्या गुलि ताःलानाच्वंगु दु, उकिया धाःसा खास हे लिच्वः पिहां वःगु मदुनि ।
 
 
तराई लागाय् अप्वः दुर्घटना जुइगु धइगु तीब्र गतिं सवारी साधन चले याइगुलिं खःसा पहाडी लागाय् धाःसा लँ चिब्याः उकी नं क्षमता स्वयां अप्वः मनूत च्वनीगुलिं नं अनियन्त्रित जुयाः दुर्घटना जूगु आपालं बुखँ न्यनेदु । अथे हे, कच्ची लँ, घुम्तीया हुनिं नं थजाःगु दुर्घटना अप्वया वनाच्वंगु दु । नकतिनि हे सक्वय् जूगु बस दुर्घटना नं क्षमता स्वयां अप्वः मनूत, अथे हे पाःलूगु नापं कच्ची लँया हुनिं दुर्घटना जूगु खनेदुसा सुकेटेया दुर्घटना चिब्याःगु लँ लिसें अप्वः मनूत दुगु व म्याग्दीया दुर्घटना कच्ची लँ व घुम्तिया हुनिं दुर्घटना जूगु अनुमान याःगु दु । धात्थें धाय्गु खःसा थजाःगु हे थीथी हुनिं जुयाच्वंगु दु, गुकियात कयाः मनूत सचेत जूगु खःसा सायद थजाःगु दुर्घटना मजुइगु खः ।
 
 
क्षमता स्वयां अप्वः यात्रुत तइगु बसयात कारवाही याय्गु धाःसां थुकियात पाय्छिकथं कार्यान्वयन मयाःगुलिं नं थजाःगु बुखँत बारम्बार वयाच्वंगु दु । अथे हे, यात्रुत नं थजाःगु सम्भावित दुर्घटनायात कयाः सचेत जूसें यात्रा मयाःसा अझं बांलाइगु खःसा नेपाःया सतकया दुरावस्था उलि हे जिम्मेवार जुयाच्वंगु दु । लँ दय्केगु ठेक्का कयाः नं इलय् क्वमचाय्कूसां सरकारं कारवाही मयासे बारम्बार म्याद थप याइगुलिं नं लँया दुरावस्थाया मू कारण खः । थुकिया जिम्मेवार सरकारं काय् हे माः ।
 
 
अप्वया वनाच्वंगु सवारी दुर्घटनायात कयाः सवारी चालक, यात्रुपिं अथे हे जिम्मेवार निकाय नं उलि हे सचेत जुइमाःगु व दुर्घटना म्हो याय्गु नितिं दय्कीगु नीति नियमयात कडा कार्यान्वयन याय्माःगु आःया आवश्यकता खः । नागरिकपिनिगु ज्यानयात कयाः खेलवाड याय्गु सुंयात अथे हे छुं नं निकाययात अधिकार मदु ।