अफगानिस्तानय् मानव संकट चरम उत्कर्षय् थ्यंगु हे इलय् नयेत्वनेगु नितिं छगू छेँजःलं थः सन्तानयात ५सः अमेरिकी डलरय् मिउगु खुलासा जूगु दु ।

तालीवानं सत्ता कःघायेधुंका खाद्य संकट व आर्थिक अभाव फयाच्वंगु छेँजःलं धमाधम सन्तान मिउगु खबरं हलिंया ध्यानाकर्षण जूगु दु ।

संयुक्त राष्ट्रसंघं अफगानिस्तानय् मानविय संकटं चरम सीमा पुलावंगु धका तःमि देय्तयेत आर्थिक ग्वहहालि यायेत तक्वःमछि अपिल जुयाच्वंगु इलय् अनया सर्वसाधारणं नये त्वनेत व त्यासा पुलेगु हे नितिं थः मस्त मिइत बाध्य जूगु खः ।

अफगानिस्तानय् ताः ई निसें ग्वहालि यानावःगु अन्तर्राष्ट्रिय कोषतयेसं ग्वहालि दिकेधुंका मानव संकट तच्वगु खः । संयुक्त राष्ट्रसंघं अफगनिस्तानय् थथें आर्थिक ग्वहालि मयाःसा लखौंलखम्हसिया ज्यान वनिगु ख्याच्वः तकं बिउगु दु ।

Categorized in अन्तर्राष्ट्रिय