अमेरिकां भारतयात व्यापार सहुलियत बन्द
लहनान्युज | सिल्लागा औंशी ११३९ (मार्च ६ २०१९)
संयुक्तराज्य अमेरिकां भारतयात बिया वयाच्वंगु व्यापार सहुलियत बन्द यायेगु घोषणा याःगु दु । तर भारत धाःसा अमेरिकी सहुलियत कटौतीं निगु देय् दथुइ व्यापारय् छु हे असर मजुइ दाबी याःगु दु ।
अमेरिकां भारतपाखे वार्षिक करिब ८० अर्ब डलर बराबरया सामान निर्यात जुया वयाच्वंगु खः । भारतया वाणिज्य सचिव अनुप वद्धवनया अनुसार अमेरिकी सहुलियत प्रणाली (जीएसपी) अन्तर्गत भारतपाखें करिब ६ अर्ब डलर बराबरया सामान जक निकासी जुइ धका धाःगु खः ।
अमेरिकी व्यापार प्रमुखया ज्याकुथिं पिकाःगु छगु वक्तव्य जारी यासें भारत व टर्कीयात बिया वयाच्वंगु जीएसपी दर्जा तत्कालै खारेज यायेगु धका धाःगु खः ।
