२०८० चैत्र १६, शुक्रबार

अमेरीकाया ओलम्पिक कमिटिं क्षमा फ्वन

लहना न्यूज सम्वाददाता | गुंंलागा पारु, ११३६ (अगष्ट १९, २०१६)

अमेरीकाया ओलम्पिक कमिटिं थः कासामिपिनिगु व्यवहारयात कयाः रियो ओलम्पिकया ग्वसाः खलःलिसे क्षमा फ्वंगु दु ।
 
अमेरीकाय स्वीमिङ कासामितयसं थःपिन्त ब्राजिलय् बन्दुक क्यनाः लुटे यात धकाः धाःगु खः । तर थुगु खँ दक्वं झुठ खः धइगु सी दयेधुंकाः अमेरीकी ओलम्पिक कमिटिं क्षमा फ्वंगु खः ।
 
थः लुँया तक्मा त्याकामि कासामितयगु व्यवहारयात कमिटिं अस्वीकार्य व्यवहार धाःगु दु । 
 
रियो पुलिसं आःतक्क स्वम्ह अमेरीकि स्वीमिङ कासामिपिंलिसे न्यनेकने यायेधुंकूगु दु । उकिया झ्वलय् पुलिसं अमेरिकि कासामि गुनार बेन्टज व ज्याक कोंगरयात न्यनेकने लिपा अमेरीका लिहां वनेत अनुमति ब्यूगु दु ।
 

पुलिसं धाल

 
रियो पुलिसं अमेरीकि कासामित लिसे न्यनेकने धुंकाः इमित छु नं कथंया मखूगु व्यवहार जूगु मदुगु धाःगु खः ।
 
बरु थुपिं मध्ये छम्ह वा निम्हेसिनं अनया पेट्रोल स्टेशनया चःबिइ तोडफोड याःगु धाल । उकथं तोडफोड याःबलय् अनया सुरक्षा गार्डतयगु हस्तक्षेप लिपा इमिसं बं पुलेमाःगु नं धाल ।
 
उगु पेट्रोल स्टेशनय् उपिं कासामितयगु आपत्तीजनक व्यवहारलिपा सुरक्षागार्डं इमित बन्दुक क्यनेत बाध्य जूगु नं रियो पुलिसं धाःगु बिबिसिं न्ह्यथंगु दु ।
Categorized in कासा