मेमेपिनि दशमिया दिनय् स्वां क्वकाइगु खःसां असंया उरायतय् धाःसा थौं अर्थात एकादशिया दिनय् तिनि स्वां क्वकाइ । अथेजुयाः थौंया दिंयात असं चालं धकाः धाइ । 

 

उकिया लिसें असंया उरायतय् थौं हे पायाः नं पिकाःगु दु । चिचीधिकःपिं मचातयगु नं ब्वति दइगु धइगु असंया पायाःयागु बिस्कं परम्परा खः ।

 

 

असंया आगंद्यःया छेँय् नं पिकाइगु पायाः असंभलु अजिमा व गनेद्यःया देगः चाःहिलाः व हे छेँय् लिहांवनाः भुइफसि पालाः क्वचाइ । कलिङ युद्ध धुंकाः ल्वाभः त्वःताः बौद्धमार्गी जूगु थुगु समुदायं थःगु न्हूगु पुस्तायात पुर्खाया बीरताबारे जानकारी बीत पायाः पिकायेगु परम्परा दयेकूगु किम्वदन्ती दु ।