आईपीएल टी–ट्वान्टी क्रिकेटया फाइनल थौं
कौलाथ्व दशमी, ११४१, शुक्रबाः
युएईस न्ह्यानाच्वंगु आईपीएल टी–ट्वान्टी क्रिकेटया फाइनल कासा थौं जुइत्यंगु दु ।
दुबईलय् जुइगु फाइनलय् चेन्नई सुपर किङ्स व कोलकाता नाइट राइडर्स दथुइ धेंधेंबल्ला जुइत्यंगु खः । फाइनल कासा नेपाली ई कथं बहनि ७ ता ई जुया ४५ गू मिनेटय् न्ह्याइ ।
महेन्द्र सिंह धोनीया कप्तानीइ दूगु चेन्नई ४क्वःखुसिइ आईपिएलया उपाधि त्याकेगु योजनाय् दु । उत्कृष्ट ब्वज्या यानाच्वंगु चेन्नई न्हापांगु क्वालिफायरय् दिल्ली क्यापिटल्सयात बुका फाइनलय् थ्यंगु खः ।
इयान मोर्गनया कप्तानीइ दूगु कोलकाता धाःसा ३क्वःखुसिइ आईपीएलया उपाधि त्याकेगु आज्जुइ दु । कोलकातां नं निगूगु क्वालिफायरय् दिल्लीयात हे बुकुगु खः । लिपांगु ५गू कासाय् चेन्नईं ४गू जित लिकाबलय् कोलकातां छक्वः त्याकुगु दु ।
लिग चरण अन्तर्गत अप्रिलय् जूगु कासाय् चेन्नईं १८गू रनया जित पिकाःगु खः । अथेहे सेप्टेम्बर २६य् जूगु कासाय् चेन्नईं २गू विकेटया जित लिकाःगु खः । कोलकाताविरुद्ध चेन्नई उगु जितयात कायम तयेगु योजनाय् दु ।
कोलकाता धाःसा चेन्नईविरुद्ध फाइनलय् बदला कायेगु मनंतुनाय् खनेदु ।
Categorized in कासा
