आप्रवासीत च्वनावंगु डुंगा दुंबलय् ११५म्ह बेपत्ता
लहना न्यूज | ने.सं. ११३९ दिल्लागा नवमि (२६ जुलाइ, २०१९), शुक्रवाः
लिबियाया तटीय लागाय् आप्रवासीत च्वनावंगु डुंगा दुंबलय् ११५म्ह बेपत्ता जूगु दु ।
तटीय लागाय् दुंपिं मध्ये १३४म्हेसिगु उद्धार याःगु उद्धारय् दुथ्याःपिं नौसेनिक अधिकारीया धापू दु ।
अफ्रिकी नापं अरवी देशया १५०म्ह च्वनावंगु उगु डुंगा तटीय लागापाखें ८गू किलोमिटर तापाक्क दुंगु उम्ह अधिकारीयात उद्धृत यासें विविसीं न्ह्यथंगु दु ।
राष्ट्रसंघीय शरणाथीै नियोग यूएनएचसीआरं थुगु घटनायात भूमध्यसागरय् थुगुसी जूगु तःधंगु पानीजहाज दुर्घटना धाःगु दु ।
हिंसा , राजनीतिक अस्थिरता व न्हियांन्हिथंया जीवन यापनया नितिं समस्या जुइवं थीथी अफ्रिकी व अरवी देशया आप्रवासीत भूमध्यसागर जुयाः अबैधकथं यूरोप दुहां वनेगु याः । गुकिया नितिं लिबिया मू लँपु जुया वयाच्वंगु दु । थ्व हे झ्वलय् दँय्दसं थजाःगु घटना जुया वयाच्वंगु दु ।
सन् २०१९या न्हापांगु प्यलाया दुने जक उकथं यात्रा यायेगु झ्वलय् समुन्द्रय् दुनाः १६४म्ह सीधुंकूगु यूएनएचसीआरया तथ्याङ्क दु ।
Categorized in अन्तर्राष्ट्रिय
