इजरायल सरकारं संसद् विघटन याःगु दु। बुधवाः प्रधानमन्त्री बेन्जामिन नेतान्याहू न गठबन्धनं संसदय् बजेट पारित याये फय्वं संसद् विघटनया निर्णय याःगु दु।

संसद् विघटन लिपा वइगु मार्च २३ य् आम निर्वाचन घोषणा याःगु दु । इजरायलय् कोरोना भाइरस (कोभिड–१९) या महामारीयात नियन्त्रणय् प्रभावकारी ज्या याये मफुगु धासे प्रधानमन्त्री नेतान्याहूया आलोचना जूया वयाच्वंगु खः। थज्यागु अवस्थाय् इजरायलय् न्हुगु निर्वाचनया घोषणा याःगु खः। वःगु निदँ न्ह्य इजरायलय् प्यक्वःगु आम निर्वाचन जुइ त्यःगु खः ।

वःगु मे महिनाय् प्रधानमन्त्री नेतान्याहु न रक्षामन्त्री बेनी गान्ट्जया पार्टी नाप मिले जुया मंकाः सरकार दय्कूगु खः । सत्तारुढ गठबन्धनय् खनेदुगु आन्तरिक विभाजन लिपा सरकारं संसद् विघटन यायेगु निर्णय याःगु खः। वःगु स्वदँया कार्यकालय् नेतान्याहू १८ महिना व गान्ट्ज १८ महिनाया लागि पालंपाः प्रधानमन्त्री जुइगु सहमति जूगु खः ।

सन् २०२१ या नोभेम्बरय् गान्ट्ज इजरायलय् प्रधानमन्त्री जुइगु तयारी जुयाच्वंगु खः। गान्ट्जं सन् २०२१ या लागि प्रस्ताव बजेट अनुमोदनया लागि नेतान्याहू नं अस्वीकार याःगु खः ।

Categorized in अन्तर्राष्ट्रिय