इटालीलिसे बूसा नं वेल्स नक आउट चरणय् प्रवेश
बछलाथ्व एकादशी ११४१,असार ७ सोमवाः
इटालीलिसे १–० या गोल अन्तरं बुसा नं वेल्स युरोकप फुटबल धेंधेंबल्लाया राउण्ड अफ सिक्सटिनय् थ्यगु दु ।
इटालीया रोमय् वंगु चान्हय् जूगु पुचः ‘ए’ या लिपांगु चरणया कासाय् घरेलु टोलीया नितिं माटियो पेसीनां निर्णायक गोल याःगु खः । वेल्सया इथन अम्पादुं ५५गूगु मिनेटय् ह्याउँगु कार्ड नयेधुंका टोली १०म्ह कासामिइ लिकुंगु खः ।
पुचः ‘ए’ या हे मेगु कासाय् स्वीटजरल्याण्डं टर्कीयात ३–१या गोल अन्तरं बुकुगु दु । अजरबैजानया बाकुइ जूगु कासाय् स्विस टोलीयात त्याका बिइत खेद्रान शाकिरीं निगू गोल याःबलय् ह्यारीस सेफेरोभिचं छगू गोल याःगु खः । वंगु चान्हय्सिया कासालिपा पुचः ‘ए’ खय् ३ गू कासापाखें ९ गू ल्याः मुना इटाली पुचः त्याकुमि जूगु दु ।
४गू ल्याः मुंगु वेल्स निगूगु थासय् लाना नक आउट चरणय् दुहाँवंबलय् उतिग्यंक ४ गू ल्याः मुंगु स्वीटजरल्याण्डं मेगु पुचःया कासा पिइमालिगु जूगु दु । पुचःया त्याकुमि व ल्यु त्याकुमि नापं ३गूथु थासय् लाइगु ६गू मध्ये ४ गू टोली युरोकप फुटबलया राउण्ड अफ सिक्सटिनय् थ्यनिइ ।
थ्वहे दथुइ युरोकप फुटबलय् थौं ४गू कासा जुइ । बहनि ९ ता ई जुया ४५ गू मिनेटय् पुचः ‘सी’ या कासाय् नेदरल्याण्ड्स व उत्तरी मेसेडोनिया अले युक्रेन व अष्ट्रिया दथुृइ धेंधेंबल्ला जुइ ।
अथेहे चान्हय् १२ ता ई जुया ४५ गू मिनेटय् जुइगु पुचः ‘बी’ या कासाय् फिनल्याण्ड व बेल्जियम अले रुस व डेनमार्क दथुय कासा जुइ । नेदरल्याण्ड्स व बेल्जियम राउण्ड अफ सिक्सटिनय् थ्यनेधुंकुगु दुसा ल्यं दूगु टोली नक आउट चरणय् थ्यनेगु नितिं लिपांगु संघर्षय् कुहाँवयेत्यंगु दु ।
Categorized in कासा
