इथियोपियाय् छन्हुं ३५०गू लख सिमा पिनाः विश्वकीर्तिमान
अफ्रिकी देय् इथियोपियां छन्हुं हे ३गू करोड ५०गू लख स्वयां अप्वः सिमा पिनाः विश्व कीर्तिमान तःगु दु ।
 
संयुक्त राष्ट्र संघ व अफ्रिकी युनियनया स्वयम् सेवीपिन्सं १२घौया इलय् उकथं सिमा पीगु ज्या जूगु इथियोपियाया खोज लिसें प्रविधि मन्त्रीयात उद्धृत यासें बिबिसीं न्ह्यथंगु दु । हरियाली वातावरणया नितिं धयादिसें प्रधानमन्त्री अबी अहमदं न्ह्यब्वयादीगु योजनाकथं देय् न्यंकया द्वःछि स्वयां अप्वः थासय् सिमा पीगु ज्या जूगु खः ।
 
बन फडाँनी नापं जलवायु परिवर्तनया हुनिं खडेरीपाखें ग्रस्त जुयाच्वंगु देशयात हरियाली दयेकेगु नितिं सिमा पीगु अवधारणा हःगु अहमदया धापू दु । इथियोपियाय् मुक्कं ४गू अर्ब सिमा पीगु लक्ष तयातःगु दु ।
 
संयुक्त राष्ट्र संघयाकथं २०गूगु शताब्दीइ ३५गू प्रतिशत बन लागा दुगु धयातःगु इथियोपियाया वन लागा सन् २०००तक थ्यंबलय् ४गू प्रतिशतय् कयेकुंगु अन सार्वजनिक याःगु तथ्याङ्कयात उद्धृत यासें विविसीं न्ह्यथंगु दु ।