२०८१ जेठ १३, आइतबार

इस्लामिक स्टेटया नेता कुरेसीयात स्यात

सिल्लाथ्व तृतीया ११४२, माघ २१ शुक्रबाः

आतंकवादी पुचः इस्लामिक स्टेट आई.एस.या नेता अबु इब्राहिम अल–हासिमी अल–कुरेसीयात स्याःगु दु ।

सिरियाय् अमेरिकी सेनां याःगु विशेष कारबाहीलय् अल कुरेसी सीगु खः । अल कुसेरी सुचुकाच्वंगु सुचंया लिधंसाय् अमेरिकी सेनां थ्यंमथ्यं चच्छि तक गोलाबारी याःगु खः ।

अनलिं सेनां घेरा तयेवं अल कुरेसी थःम्हं थःम्हेसित विष्फोट याकूगु धागु दु । थः बिस्यु वने मफइगु पक्का जुइवं कुरेसीं थः छेँजःलिसे आत्माघाति विष्फोट याकूगु खः ।

उत्तरी सिरियाया छगू शहरय् अल कुसेरी सुलाच्वंगु गोप्य सूचंया लिधंसाय् अमेरिकी सेनां हताः याःगु अमेरिकी राष्ट्रपति जो बाइडेनं पुष्टि यानादीगु दु ।

घटनाय् आईएसया मेम्ह छम्ह वरिष्ठ नेता न सीगु अमेरीकां दाबी याःगु दु । अतिवादी पुचः आई.एसं धाःसा घटनाबारे आःतक औपचारिक कथं प्रतिक्रिया मब्यूनि ।

Categorized in अन्तर्राष्ट्रिय