उत्तर कोरियाय् विदेशी उत्पादन व फेसनया नक्कल यासा मृत्युदण्ड
लहनान्यूज | बछलागा एकादशी ११४१, जेष्ठ २४ सोमबाः
उत्तर कोरियां थःगु देशय् विदेशी प्रभाव पनेत न्हूगु कानुन लागू याःगु दु ।
नेता किम जोङ उनं विदेशी प्रभाव थःगु देशय् मलायकेगु ताः तयाः न्हूगु कानुन लागू यानादीगु खः । न्हूगु कानुन कथं उत्तर कोरियाय् विदेशी संकिपा क्यनेगुलिइ तकं प्रतिबन्ध तःगु दु ।
अथेहे विदेशी कापः छ्यले मदइगु यानाः न्हूगु कानुन हःगु दुसा यदि कानुन अःखः ज्या यासा कारबाही जुइगु धागु दु । अथेहे विदेशी फेसनया नक्कल याइपिन्त तकं कडा कारवाही यायेत नेता उनं निर्देशन बियादीगु दु ।
अथेहे अवैध भिडियो स्वःसा मृत्युदण्ड तकया सजाय बीदइगु यानाः न्हूगु कानुन हःगु बीबीसीं धागु दु । इन्टरनेटय् राज्यया नियन्त्रण कायम दुगु धासें सरकारी सञ्चारमाध्यमबाहेक मेमेगु सञ्चारमाध्यम सञ्चालनय् न प्रतिबन्ध तःगु दु ।
उत्तर कोरियां थःगु देशं पिनेया सूचनय् नागरिकपिन्त नियन्त्रण यायेत्यंगु विश्लेषकपिन्सं धागु दु । ताःईनिसें नाकाबन्दी फयाःवःगु उत्तर कोरियां वंगु दँनिसें हलिन्यंकं न्यंगु कोरोना महामारीया असरया विषयलय् आःतक छुं न कथंया आधिकारीक सूचं पितमब्यूनि ।
अथेहे थ्वहे दँया सुरुइ नेता किमं थः नागरिक कष्टपूर्ण जिवनयापन यायेत बाध्य जूगु धाःसां मेमेगु देशं बीगु ग्वहालि स्वीकार मयायेगु घोषणा यानादीगु खः ।
Categorized in अन्तर्राष्ट्रिय
