जर्मन चान्सलर एन्जेला मर्केल थौंनिसें पदमुक्त जुइत्यंगु दु । न्हूम्ह चान्सलरया रुपं थौंनिसें हे ओलाफ शुल्जं कार्यभार कःघानादी ।

वय्कलं थौं हे पद अले गोपनियताया शपथग्रहण यानादी । सन् २००५ या नोभेम्बर २२य् जर्मनीया चान्सलर जूम्ह मर्केल जर्मनीया इतिहासय् छम्ह जक मिसा चान्सलर खः ।

थःगु कार्यकालय् वय्कः तसकं लोकं ह्वायेत ताःलात । वय्कःया कार्यकालय् प्यम्ह अमेरिकी राष्ट्रपति, प्यम्ह फ्रान्सेली राष्ट्रपति, न्याम्ह बेलायती प्रधानमन्त्री हिलेधुंकल ।

अथेसां थःगु कार्य कुशलताया हुनिं दक्वं राष्ट्रलिसेया स्वापू सुमुधुर दयेकेत मर्केल ताःलात । पदमुक्त जुयाच्वंबलय् मर्केलं न्हूम्ह चान्सलर शुल्जयात न्ह्याबलें साथ व ग्वहालि यायेगु बचं बियादीगु दु ।

न्हूम्ह नियुक्त चान्सलर शुल्जं नं देय् व जनताया हितय् ज्या यायेगु बचं बियादीगु दु ।

Categorized in अन्तर्राष्ट्रिय