एपीएफ क्लब आहा रारा गोल्डकप फुटबलया फाइनलय्
पोहेलागा नवमी ११४२, माघ १२ बुधवाः
एपीएफ क्लब आहा रारा गोल्डकप फुटबलया फाइनलय् दुथ्यागु दु ।
पोखरा रंगशालाय् बुधबाः जूगु सेमिफाइनलय् मछिन्द्र क्लबयात ३–१ गोलं बुकाः एपीएफ फाइनलय् दुथ्याःगु खः । एफीएफया लागि सनिश श्रेष्ठ, प्रदीप लामा व नवीन लामां छगोल–छगोल याःगु खः ।
अथेहे मछिन्द्रया ओमोलाजा करिमं छगोल लिछ्यात । कासाया २५गू मिनेटमय एपीएफया सनिशं गोल यासें टोलीयात न्ह्यने लाकूगु खः ।
तर ४०गू मिनेटय् मछिन्द्रया ओमोलाजां गोल यासें कासायात छगोल–छगोलया ज्वलिंज्वले थ्यंकूगु खः । वयांलिपाः ६९गू मिनेटय् प्रदीप व इन्जुरी ईलय् नवीनं याःगु गोललिसें एपीएफ ३–१ गोलं त्याःगु खः ।
आः एपीएफं मनाङ मस्र्याङ्दी व त्रिभुवन आर्मी क्लब दथुई त्याकुमिलिसे शनिबाः धेँधेँबल्ला जुई । मनाङ व आर्मी दथुया सेमिफाइनल कन्ह्य जुइ ।
१०गू टोली दुथ्यागु कासाया त्याकुमिं १०गू लखः व द्वःछि व लिउत्याकुमिं ५गू लख द्वःछिया सिरफा त्याकि ।