विश्व स्वास्थ्य संगठनं कोरोनाया न्हूगु भेरियन्ट ओमिक्रोनया नियन्त्रणय् नं आः छ्यलाच्वंगु खोपं हे ज्या याइगु धाःगु दु ।

ओमिक्रोन भेरियन्टया संक्रमण जूसां खोप काःपिं मनूत तसकं विरामी मजुइगु डब्ल्युएचओया अधिकारीतय् धापू दु । दक्षिण अफ्रिकाया ओमिक्रोन संक्रमितय् याःगु परीक्षणं खोपया प्रभावकारिता पुष्टि याःगु खः ।

अथेसां गुगु हदतक्क खोपं ज्या याः धइगु निक्र्यौल धाःसा जुइ ल्यं दनि । डब्लुएचओया डा. माइक रायनं ओमिक्रोन भेरिएन्ट नं खोपया प्रभावकारिता छले यायेत मेगु भेरियन्ट स्वयां चलाख खनेमदुगु धयादिल ।

खोप काःपिं मनूत नं ओमिक्रोनं तसकं विरामी जुइगुलिं बचे जुइगु वय्कःया विश्वास दु । थ्वयां न्ह्यः लूगु कोरोनाया भेरियन्टत स्वयां अप्वः समस्या ओमिक्रोनं महइगु डब्ल्युएचओया लिच्वः दु ।

वैज्ञानिकतय्सं धाःसा ओमिक्रोनय् आःतक्क विकसित खोपत छले यायेफइगु क्षमता अप्वः दुगु धासें सचेत जुयाच्वनेत चेतावनी बियाच्वंगु दु ।

Categorized in अन्तर्राष्ट्रिय