ओलम्पिकय् दुथ्याय्त नेपाःया कासामी थौं वनिगु
दिल्लाथ्व षष्ठी, श्रावण १, शुक्रबाः
टोकियो ओलम्पिकय् दुथ्यायेत नेपाःया निम्ह कासामित थौं जापान वनेत्यंगु दु ।
जुडोया सोनिया भट्ट व सुटिङकी कल्पना परियार थौं उखय्पाखे वनेत्यंगु खः । इपिं निम्हेसितं वाईल्ड कार्डपाखें टोकियो अोलम्पिकय् दुथ्यायेगु ह्वःताः चूलाःगु खः । जुडोया प्रशिक्षक सूर्यनारायण श्रेष्ठ व सुटिङया प्रशिक्षक असिम यादव तकं थौं हे टोकियो वनीगु जूगु दु ।
थौं टोकियो वनीगु पुचःयात राष्ट्रिय खेलकुद परिषद्या सदस्यसचिव रमेश सिलवालं नेतृत्व याइ । सिलवाल टोकियो ओलम्पिकया नितिं नेपाली प्रतिनिधिमण्डलया ‘सेफ द मिसन’ खः । थौं कुल १०म्हेसिया पुचः टोकियो ब्वयेगु तयारी यानाच्वंगु दु ।
अथेहे वइगु सोमवाः नेपाल ओलम्पिक कमिटी, एनओसीया नायः जीवनराम श्रेष्ठया नेतृत्वय् न्याम्ह दुजःया पुचः जापान ब्वइगु जूगु दु । अथेहे साउन १० गते राखेपया न्वकू शिव कोइरालाया नेतृत्वय् एथलेटिक्स कासामि सरस्वती चौधरीलिसे प्यम्ह जापान वनी ।
थ्वसिवे न्ह्यः स्वीमिङया निम्ह कासामि अले छम्ह प्रशिक्षक जापान थ्यकेधुंकूगु दु । टोकियो ओलम्पिकय् नेपाःया ५म्ह कासामिलिसे कुल २६म्हेसितं ब्वति काइगु जूगु दु । ओलम्पिकया कासात थ्वहे साउन ८ गतेनिसें न्ह्याइ ।
Categorized in कासा
