ओलीं याःगु मन्त्रिपरिषद् विस्तारविरुद्ध रिटय् थौं सुनुवाइ
लहनान्यूज | कछलागा त्रयादशी ११४१, जेठ २५ गते मंगलबाः
प्रधानमन्त्री केपी शर्मा ओलीं याःगु मन्त्रिपरिषद् विस्तारविरुद्ध सर्वोच्च अदालतय् दर्ता जूगु रिटय् थौं सुनुवाइ जुइत्यंगु दु ।
संसद् विघटन यानाः निर्वाचनया घोषणा याःगु कामचलाउ सरकारं संविधानअःखः मन्त्रिपरिषद् विस्तार याःगु धासें लाःगु ६गू रिटय् थौं सुनुवाइ जुइत्यंगु दु । वरिष्ठ अधिवक्ता दिनेश त्रिपाठी, अधिवक्ता कञ्चनकृष्ण न्यौपानेनापंयापिन्सं मन्त्रिपरिषद् विस्तारविरुद्ध सर्वोच्च अदालतय् रिट तःगु खः ।
थौंया सुनुवाइलं अन्तरिम आदेश ब्यूसा आःतिनि मन्त्री जूपिं हाकन पदमुक्त जुइ । प्रधानमन्त्री ओलीं शुक्रवाः जनता समाजवादी पार्टीया महन्थ ठाकुर–राजेन्द्र महतो पुचःया १०म्ह अले एमालेया निम्हेसित मन्त्री नियुक्त यानादीगु खः । वरिष्ठ अधिवक्ता त्रिपाठीया रिटय् मन्त्रिपरिषद् विस्तार यायेगु प्रधानमन्त्रीया पलाः गैरसंवैधानिक, बदनियतपूर्ण व संविधान अःखः जूगु उल्लेख यानातःगु दु ।
थ्वसिवे न्ह्यः म्हिगः प्रधानन्यायाधीश चोलेन्द्रशमशेर राणा बिरामी जूगु धासें म्हिगःया नितिं क्वःछ्यूगु संवैधानिक इजलास लिछ्याःगु खः । प्रधानन्यायाधीश राणां थः बिरामी जूगु कारण क्यनाः संवैधानिक इजलास मच्वनेगु जानकारी बीवं म्हिगःया इजलास लिछ्याःगु खः । तर प्रधानन्यायाधीश राणाया स्वास्थ्यय् गू गन्यागु समस्या जुल धइगु विषय स्पष्ट मयाः ।
सर्वोच्च स्रोतं धाःकथं संवैधानिक इजलासया मेगु पेसी बुधवाः क्वःछ्यूगु दु । थ्वसिवे न्ह्यः आइतवाः प्रधानन्यायाधीश चोलेन्द्रशमसेर जबरां थःनाप न्यायाधीश दीपककुमार कार्की, मीरा खड्का, ईश्वर खतिवडा व आनन्दमोहन भट्टराई दुथ्याःगु संवैधानिक इजलास गठन यानादीगु खः । इजलासय् दुपिं न्यायाधीशपिन्त न्ह्यसः थनेवं न्हापांगु वालंनिसें मुद्दाया मूल विषयलय् दुहाँवने मफुनि ।
आइतवाः न न्यायाधीशपिनिगु निष्पक्षताय् न्ह्यसः थनेवं उकिइ हे जक बहस यायेमाःगु खः । सुनुवाइया झ्वलय् प्रधानमन्त्री केपी शर्मा ओलीयात धारा ७६ (५) कथं प्रधानमन्त्री यायेत आदेश माग यानाः रिट ब्यूपिं प्यम्हेसिनं संवैधानिक इजलासया रोस्टरय् दुपिं सुं न न्यायाधीशं थ्व मुद्दा स्वये मदइगु यानाः निवेदन ब्यूगु खः ।
संवैधानिक इजलासया रोस्टरय् प्रधाननन्यायाधीश राणा, न्यायाधीश दीपककुमार कार्की, मीरा खड्का, हरिकृष्ण कार्की, विश्वम्भर श्रेष्ठ, ईश्वरप्रसाद खतिवडा, आनन्दमोहन भट्टराई, अनिल सिन्हा, प्रकाशसिंह राउत, सपना प्रधान मल्ल, तेजबहादुर केसी, बमकुमार श्रेष्ठ व टंकबहादुर मोक्तान दु । इपिं न्यायाधीशपिनिगु संसदीय सुनुवाइ यानाः अनुमोदन यायेगु समितिइ आः प्रतिनिधिसभा विघटनविरूद्ध रिट ब्यूपिं गुलिख्य निवेदक तकं दुगु तर्क यानाः सरकार पक्षया कानुन व्यवसायीपिन्सं रोस्टरं थ्व मुद्दा स्वये मदइगु तर्क याःगु दु ।
Categorized in राष्ट्रिय
