कन्हय निसे स्वन्हुयंकं महानगर महोत्सव
नृपेन्द्रलाल श्रेष्ठ | थिंलाथ्व सप्तमी ११३९ (दिसेम्वर १४ २०१८)
येँ महानगरपालिकां कन्हय् महानगर दिवस हने त्यःगु दु । वि.सं. २०५२ साल मंसिर २९ गते तत्कालिन येँ नगरपालिकायात महानगरपालिका घोषणा याःगु न्हियात लुमंकाः महानगर दिवस हनेगु याना वयाच्वंगु खः ।
कन्हय् सुथय् बसन्तपुरय् जुइगु उगु ज्याझ्वलय् प्रधानमन्त्री केपी ओलीं महानगर दिवसया उलेज्या यानादी ।
म्हिगः महानगरपालिकाया ज्याकुथी जूगु पत्रकार सम्मेलन याना मेयर विद्यासुन्दर शाक्यं महानगर दिवस बारे जानकारी बियादीगु खः ।
कन्हय जुइगु उगु दिवसय् येँ देय्या न्हापांम्ह मेयर जनकमान श्रेष्ठयात हनेगु, उत्कृष्ट सामुदायिक व निजी स्कूलयात हनेगु, सुशासन पत्रकारिता पुरस्कार लःल्हायेगु, बाजं गुरुपिंत हनेगु ज्याझ्वः द ।
उगु दिवसया कन्हय निसे स्वन्हुयंकं महानगर महोत्सव नं याइगु जूगु दु । महोत्सवय् मरु, असं, वन्दे, किलागः, लगं आदि लागाय् नेवाः नसा ब्वज्या लिसें प्रदर्शन नं याइगु ग्वसाः दु ।
अथेहे बसन्तपूया दबुली ज्यापु महागुथि येँ जिल्लापाखें सांस्कृतिक ज्याझ्वः नं यायेत्यंगु दु ।
