२०८१ जेठ ९, बुधबार

करोड स्वयां आपाः ठगेयाःम्ह ज्वन

लहनान्यूज सम्वाददाता | कछलागा तृतीया ११३७ (नोभम्बर १७ २०१६)

वैदेशिक लजगालय् ब्रुनाइ छ्वयाबी धकाः ३०म्हेसिके १ करोड स्वयां आपाः धेबा उठे यानाः बिस्युं वनाच्वंम्ह छम्हेसित प्रहरीं ज्वंगु दु ।
 
ब्रुनाइ छ्वयाबी धासें ३०म्हेसिके १ करोड ३० लाख दां म्हयाः बिस्युं वनाच्वंम्ह सिमिचौरयाम्ह थौंकन्हय् न्हू बानेश्वरय् ईलान इन्टरनेशनल नांया मेनपावर कम्पनी न्ह्याका वयाच्वंम्ह घनश्याम अर्यालयात महानगरीय अपराध महाशाखां खटेजूगु प्रहरीया टोलिं ज्वंगु खः । धेबा कायेत अर्यालं नक्कली डिमान्ड व भिसा क्यंगु अनुसन्धानपाखें सी दुगु नं महाशाखां न्ह्यथंगु दु ।
 
अर्यालयात ज्वनेधुंकाः आः आवश्यक अनुसन्धान अले कारवाहिया लागिं महानगरीय प्रहरी परिसर येँय् छ्वःगु दु ।
 
धेबा कयाः स्वापुतिइ मवःबलय् पिडितं महाशाखाय् निवेदन बीधुंकाः अनुसन्धान न्ह्याःगु खः । अर्यालं उकथं हे मेपिं यक्व बेरोजगारतयत ठगे याःगु आशंकाय् अनुसन्धान न्ह्यानाच्वंगु दनिगु महाशाखां न्ह्यथंगु दु ।
Categorized in अपराध