कांग्रेस पदाधिकारी मुँज्याय् मन्त्रीतय् छनोट व आसन्न महाधिवेशनया खँय् सहलह जुइगु
ञलाथ्व द्वादशी ११४१, असोज ६ बुधबाः लहनान्यूज
नेपाली कांग्रेसया पदाधिकारीतये मुँज्या थौं च्वनेत्यंगु दु । न्हिने ३ता इलय् प्रधानमन्त्री शेरबहादुर देउवाया निजी निवास बूढानीलकण्ठय् च्वनिगु मुँज्याय् सरकारय् दुथ्याइपिं मन्त्रीतये छनोट व आसन्न महाधिवेशनया खँय् सहलह जुइ ।
म्हिगः च्वंगु सत्ता गठबन्धनया मुँज्याय् थथें परराष्ट्रमन्त्री नियुक्त यायेगु सहमति जूगु खः । प्रधानमन्त्री देउवां नेता डा. नारायण खड्कायात परराष्ट्रमन्त्री दयेकेगु तयारी यानादीगु दु ।
तर कांग्रेसया हे संस्थापन इतर पक्ष धाःसा देउवाया उगु निर्णयलय् सहमत मदु । अथे जूगुलिं पार्टी मुँज्यां हे मन्त्री नियुक्तिया निर्णय याकेत देउवां मुँज्या सःतादीगु ताकं याःगु दु ।
संभव जूतले डा. खड्कायात थौं हे पद लिसें गोपनीयताया शपथ याकेगु तयारी जूगु सीदूगु दु । अनलिं वयेक राष्ट्रसंघया महासभाय् ब्वति कायेत न्युयोर्क झायादी । कांग्रेसया पदाधिकारी मुँज्याय् महाधिवेशन अन्तर्गत वडा अधिवेशन जुइत ल्यं दूगु जिल्लाया अधिवेशनया न्हूगु मितया खँय् नं निर्णय जुइगु संभावना दु ।
प्रदेश नं. २ या ८गू जिल्ला लिसें सुर्खेत, डोल्पा, रसुवा, रुपन्देही व कैलाली याना १३गू जिल्लाया क्रियाशील सदस्यता विवरण अझं सार्वजनिक जुइ मफूगुलिं उपिं जिल्लाय् वडा अधिवेशन जुइ मफूगु खः ।
Categorized in राजनीति
