कात्तिक ७ गते निसे (क्लिन फिड) दयेकेत सरकारयात निर्देशन
लहानान्युज | अनलाथ्व ४ ११४०, असोज ५ सोमवाः
संसदया विकास तथा प्रविधि समितिं वइगु कात्तिक ७ गते निसे नेपालय् प्रशारण जुया वयाच्वंगु टेलिभिजन च्यानलपिन्त विज्ञापनरहित (क्लिन फिड) दयेकेत सरकारयात निर्देशन बिःगु दु ।
सोमवाः सञ्चार तथा सूचना प्रविधि मन्त्रालयया सचिव लगायतया पदाधिकारी नाप सहलह लिपा समितिं डाउनलिंक अनुमति कया नेपालय् प्रशारण जुया वयाच्वंगु टेलिभिजन च्यानलपिन्त विज्ञापनरहित दयेकेत निर्देशन बिःगु दु ।
नेपालय् विज्ञापन (नियमन गर्ने) ऐन २०७६ य् कार्यान्वयन २०७७ कात्तिक ८ गते निसे सुरु जुइ त्यःगु खः । उकि समितिं उगु तिथि स्वया छन्हु न्ह्यः हे नेपालय् क्लिन फिड सुरु यायेत निर्देशन बिःगु खः ।
नेपालय् क्लिनफिड मजुगु विदेशी च्यानलयात प्रशारण रोके यायेत मन्त्रालयं दयेकुगु योजना न समितिं फ्वःगु दु । थ्व ऐनयात कार्यान्वयनपाखे नेपालय् ग्वःगु विदेशी च्यानल रोके जुइगु अवस्थाय् दु व थुकि याइगु सकारात्मक व नकारात्मक प्रभावया बारेय् मन्त्रालयया धारणा १५ दिं दुने छ्वयेत समितिं निर्देशन बिःगु दु ।
समितिं नेपालपाखे विदेशी टेलिभिजन च्यानलय् विज्ञापन प्रशारण यायेगु नीति (फिड इन) मकायेत सञ्चार मन्त्रालययात निर्देशन बिःगु दु।
Categorized in राष्ट्रिय
