किपू नगरपालिका वडा नं. १० य् दुगु कीर्तिपुर कभर्ड हल किपू नगरपालिकायात हस्तान्तरण याःगु दु।

किपू नगरपालिकाया अमल्सि थासय् उगु भवन छगू ज्याझ्वः दथुइ राष्ट्रिय खेलकुद परिषदया सदस्य सचिव रमेश सिलवालं किपू नगरपालिकाया मेयर रमेश महर्जनयात कभर्ड हल हस्तान्तरण यायेगु लागि ल्हाचिं तयादीसे हस्तान्तरण यानादीगु खः । ज्याझ्वलय् थःगु खँ तयेगु झ्वलय् परिषदया सदस्य सचिव सिलवालं नेपाल सरकारं प्रत्येक स्थानीयपालिकाय् छगु कभर्ड हल दय्केगु नीति कथं थौं किपूलि परिषदया स्वामित्वय् दुगु कभर्ड हल स्थानीयपालिकाया हस्तान्तरण याये दया तसकं लय्ताःगु दु धका धयादीगु खः।

नेपालय् दक्को थासय् खेलकुदया विकास याये माःगुलि बःबियादीसे सदस्य सचिव सिलवालं नेपाःया विकट थाय् मुगु जिल्लाय् तक मिसापिन्स फुटबल कासाया विकास यायेगुलि उल्लेखनिय ज्या जुगु बार्सिलोनाय् तक सःता कासा म्हितकूगु धका धयादीगु खः।

अथेहे नेपाल जुडो संघया उपाध्यक्ष तक जुयादीम्ह किपू नगरपालिकाया मेयर रमेश महर्जनं कीर्तिपुर कभर्ड हल थःगु नगरपालिकाय् हस्तान्तरण यागुलि परिषदया सुभाय् देछानादीगु खः। कासाया ख्यलय् किपू न्ह्येन हे दुगु धका धयादीसे किपू नगरपालिकां मेयर खेलकुद् कासा याना वयाच्वंगु दु धका धयादीगु खः। तर थुगु दँय् कोभिडया कारण स्थगीत जुगु खः। थुगु दँय् हाकन यायेगु ग्वसाः दु धका धयादीगु खः।

मेयर कपाया लागि प्रशिक्षण जुयाच्वंगु दु धका मेयर महर्जनं धयादीसे फुटबल, भलिबल, ब्याडमिण्टन, टेबलटेनिस, चेस व बास्केटबल याना खुगु कासाय् प्रशिक्षण वःगु मंसिर १३ गते निसे न्ह्याये धुकुगु दु धका धयादीगु खः । वगु दँय् सागय् थुगु कीर्तिपुर कभर्ड हलय् फेन्सिङ्ग व खो–खो याना निगु कासा जुगु खः।

उगु ज्याझ्वः किपू नगरपालिकाया प्रमुख प्रशासकीय अधिकृत सीता परियारं लसकुस यानादीगु खःसा सामाजिक शाखा प्रमुख अनुज प्रधानं न्ह्याकादीगु खः। 

Categorized in कासा