किपू नगरपालिकाया नियमित पत्रकार सम्मेलन
नृपेन्द्रलाल श्रेष्ठ | सिल्लाथ्व तृतिया ११४० (जनवरी २७ २०२०)
किपू नगरपालिकाया नियमित पत्रकार सम्मेलन जूगु दु । उगु ज्याझ्वलय् नगरपालिकाया उप–प्रमुख सरस्वती खड्कां लसकुस यानादीगु खःसा सूचना अधिकृत परशुराम चौलागाईं नगरपालिकाया फुक्क शाखाया २०७६ पुष महिनातकया प्रगति प्रतिवेदन न्ह्यब्वयादीगु खः ।
पत्रकारपिन्सं न्यंगु न्ह्यसःया लिसः बियादिसें शिक्षा शाखा प्रमुख टंकलाल गैरें किपू नगरपालिकाया मौलिक ज्याझ्वः छेँछेँय् सिंहदरबार अन्तरगत प्राविधिकपाखे उच्च शिक्षा हासिल याय्त सहुलियत दरय् नगरपालिकापाखें शैक्षिक कर्जा बीगु ज्या जुयाच्वंगुलिइ आःतक न्हय्म्हेस्यां उगु कर्जाया नितिं प्रकृया न्ह्याकूगुलिइ निम्हेस्यां कर्जा काय्धुंकूगु व न्याम्हेसिगु प्रकृया अन्तिम चरणय् थ्यंगु जानकारी बियादिल ।
नगरपालिकाया उप–प्रमुखलिसें प्रवक्ता खड्कां पत्रकारपिन्सं न्यनादीगु न्ह्यसःया लिसः बियादिसें न्हापा यानागु प्रतिबद्धताकथं हे नगरपालिका क्षेत्र दुनेया लँय् दयाच्वंगु गाः ल्हाकेत प्यम्ह कर्मचारीं ज्या यानाच्वंगु जानकारी बियादिल ।
