केन्यालिसे नेपाल ५ विकेटं बुत
लहनान्यूज | चिल्लाथ चतुर्दशी ११३७ (मार्च ११ २०१७)
आइसीसी वर्ल्ड क्रिकेट लीग अन्तर्गत थौं किपूया ख्यलय् जूगु नेपाल व केन्या दथुइया कासा केन्यां ५ विकेटं त्याकूगु दु ।
वा वयाः लिच्वः लाःगु कासाय् डकलुइस मेथडया लिधंसाय् केन्यायात ९४ रनया आज्जु ब्यूगु खः । उगु आज्जु केन्यां २४ ओभरय् ५ विकेट छ्वयाः ल्हातय् लाकल ।
वा वःगुलिं ३८ ओभर जक म्हितूगु नेपालं ३६ ओभरय् ८ विकेट तंकाः ११२ रन दयेकूगु खः । डकलुइस मेथडया लिधंसाय् केन्यायात २९ ओभरय् १०४ रनया आज्जु ब्यूगु खः ।
केन्यां २१.२ ओभरय् ५ विकेट तंकाः ८० रन दयेकूबलय् हाकनं वा वयाः कासा द्यूगु खः ।
उगु इलय् डकलुइस मेथडया लिधंसाय् केन्या त्यायेधुंकूगु खः । तर, नेपालं कासा म्हितेगु धायेधुंकाः केन्यायात २६ ओभरय् ९४ रनया न्हूगु आज्जु ब्यूगु खः ।
११ बल म्हिते ल्यं दनिबलय् ५ विकेट तंकाः केन्यां कासा त्याकाकाल ।
आः नेपाल व केन्या दथुइया निर्णायक कासा वइगु सोमबाः जुइ ।
म्हं मफयाः पारसं मम्हितू
म्हं मफयाः कप्तान पारस खड्कां थौं कासा मम्हितूगुलिं ज्ञानेन्द्र मल्लं नेपालया कप्तानी याःगु खः । टस बुनाः न्ह्यः ब्याटिङ याःगु नेपालपाखें ज्ञानेन्द्रं दक्कले आपाः २७ रन दयेकूगु खः ।
थौंया कासापाखें राष्ट्रिय टिमय् डेब्यू याःम्ह दिपेन्द्रसिंह ऐरीं १९ रन दयेकल । सागर पुनं १० रन दयेकल ।
शक्ति गौचन व सोमपाल कामीं ९गूगु विकेटया लागिं अविजित ३० रनया किर्तिमानी साझेदारी यात । शक्ति गौचनं १८ व सोमपाल कामिं १५ रन दयेकल ।
ओपनर सुनिल धमला ३ रनय् आउट जुल सा शरद भेषावकरं नं ३ रन जक दयेकेफत । अथे हे विनोद भण्डारी ४ रन दयेकाः पेभिलियनय् लिहांवंबलय् मेहेबुब आलमं २ रन व बसन्त रेग्मी ६ रनय् आउट जुल ।
Categorized in कासा
