कोपा अमेरिका फुटबलय् अर्जेन्टिनाया जित
बछलाथ्वः द्वादशी ११४१, असार ८ गते मंगलबाः
कोपा अमेरिका फुटबलय् अर्जेन्टिनां पाराग्वेयात १–०या गोल अन्तरं बुकुगु दु ।
ब्राजिलय् न्ह्यानाच्वंगु धेंंधेंबल्ला अन्तर्गत थौं सुथय् जूगु कासाय् अर्जेन्टिनायात त्याकाबिइत कासाया १०गूगु मिनेटय् अलेहान्द्रो गोमेजं याःगु गोल हे निर्णायक जुल । कासा त्यागु नापं अर्जेन्टिनां पुचःया ३गू कासां ७ गू ल्याः मुंकुगु दु ।
थ्वयान्ह्यः न्हापांगु कासाय् उरुग्वेयात १–०या गोल अन्तरं बुकुगु अर्जेन्टिनां निगूगु कासाय् चिलीलिसे १गू १गू गोलया ज्वलिन्ज्वः म्हितुगु खः । कोपा अमेरिकाया हे मेगु कासाय् उरुग्वे व चिलीं १गू–१गू गोलया ज्वलिन्ज्वः कासा म्हितुगु दु ।
थुगु पुचःपाखें आःतक्क अर्जेन्टिना व चिली क्वाटरफाईनलय् थ्यनेधुंकुगु दु । ५गू टोली दुथ्यागु पुचःपाखें छगू टाली जक पिहाँवनिसा ४गू टोली क्वाटरफाइनलय् थ्यनिगु प्रावधान दु ।
कोपा अमेरिका फुटबलया निगू पुचःलय् याना १०गू टोली दुथ्यागु दु ।
Categorized in कासा
