२०८१ आषाढ ३१, सोमबार

कोरोना रोकथामपाखे चन्द्रागिरी नगरपालिकाया पलाः

नृपेन्द्रलाल श्रेष्ठ | चौलाथ्व षष्ठी ११४०, चैत्र १७ गते

स्वनिगलय् कोरोना रोकथाम व नियन्त्रणया लागिं चन्द्रागिरी नगरपालिका नं छगू प्रमुख थाय् जुयाच्वंगु दु । स्वनिगलं पिहांवनेगु वा दुहांवयेगु मू नाका जूगु ल्याखं नं चन्द्रागिरी नगरापालिकाया भूमिका आःया अवस्थाय् अहम् रुपं कयाच्वंगु दु । 
 
आःया अवस्थायात कयाः चन्द्रागिरी नगरपालिकां नं थःगु सक्रियता अप्वयेकूगु दु ।
 
चन्द्रागिरी नगरपालिकां दक्कले न्हापां हे नागढुङ्गां स्वनिगलय् दुहां वइपिं वा पिहांवनीपिन्त लक्षित यानाः हेल्थ डेस्क स्थापना यायेधुंकूगु दु ।
 
नगरपालिका दुनेया अस्पताल, स्वास्थ्य चौकीया स्वास्थ्यकःमितय्त पिपिइ छगू छगू सेट नं उपलब्ध याकेधुंकल । उकिया नापं स्वास्थ्यकःमितयत मास्क, पंजाया नापं स्यानिटाइजर नं उपलब्ध याकूगु दु ।
 
लहनान्यूजलिसे खँ ल्हासें चन्द्रागिरी नगरपालिकाया मेयर घनश्याम गिरीं नगरपालिका दुनेया स्वास्थ्य चौकीत विदाय् नं चायेकेगु व्यवस्था ताःलाकागु धयादिल । आःया अवस्थाय् स्वास्थ्यकःमिया भूमिका महत्वपूर्ण जुइगु ल्याखं उमिगु मनोबल थकायेत स्वास्थ्यकःमियात भत्ताया नं व्यवस्था यानागु वयकलं धयादिल ।
 
नगरपालिका दुने दक्वं थासय् नेपाल प्रहरी, नेपाली सेना तकंया सहयोगय् डिसइनफेक्सन स्प्रे यायेगु ज्या जुयाच्वंगु वयकःया धापू खः ।
 
विदेशं वःपिनिगु नां मुंकेगु ज्या जुयाच्वंगु जानकारी ब्युसें आःतक्क सच्छि व ३० विदेशं वःपिनिगु नां मुनेधुंकूगु वयकलं कनादिल । 
 
स्थानीयं अत्यावश्यकीय ज्वलंया समस्या फयेम्वाःलेमा धइगु ल्याखं खाद्यान्न, लः, पेट्रोलियम ज्वलं, फलफुल, वासः व ला पसः चायेके बियातयागु नं वयकलं धयादिल ।
 
स्वनिगलय् संक्रमणया सम्भावना क्वपालेत थन मनूया चाप नं म्ह्वः यायेमाःगु खँयात ध्यानय् तयाः स्वनिगलं पिहां वनीपिन्त थःथःगु थासय् वनेत बसया व्यवस्था नं यानातयागु वयकलं धयादिल । आः थुगु ज्या थःगु हे पहलय् अनौपचारिक रुपं यानाच्वनागु जूसां औपचारिक रुपं हे यायेगु तयारी जुयाच्वंगु मेयर गिरीं धयादिल ।
 
चन्द्रागिरी नगरपालिका अन्तर्गत नेपाल सरकारं नगरपालिका दुने राष्ट्रिय आइसोलेसन सेन्टर दयेकेगु योजना कथं आः उगु सेन्टर दयेकाच्वंगु व याकनं हे संचालनय् हयेगु नितिं थःपिं सक्रिय दुगु नं वयकलं धयादिल ।
 
न्हिं ज्या यानाः नयेमाःपिं, संकटया अवस्थाय् दुपिनिगु नां धलः मुंकेगु ज्या जुयाच्वंगु व समस्या जूगु अवस्थाय् इमित नकेगु व्यवस्था नं यायेगु कथं ज्या यानाच्वनागु गिरीया धापू खः ।
Categorized in राष्ट्रिय