कोरोना रोकथामय् छु यानाच्वन ख्वप नगरपालिकां
नृपेन्द्रलाल श्रेष्ठ | चौलाथ्व पञ्चमी ११४०,चैत्र १६ गते
ख्वप नगरपालिकां कोरोना भाइरस कोभिड १९ रोकथाम व नियन्त्रणया नितिं सरकारं घोषणा याःगु लकडाउन सफल यायेत फक्व कुतः यानाच्वनागु धाःगु दु ।
भाइरसया संक्रमण पनेगु नितिं लकडाउनया इलय् म्वायकं छेँय् नं पिहांमवयेत नगरबासी दथुइ सचेतनामूलक हसना बियाच्वनागु ख्वप नगरपालिकाया मेयर सुनिल प्रजापतिं धयादिल ।
लहनान्यूजलिसे खँ ल्हासें मेयर प्रजापतिं सकलसित छेँय् हे च्वनाच्वनेत इनाप यासें माइकिङ यायेगु आदि ज्या जुयाच्वंगु धयादिल ।
उकिया नापं खाद्यान्न लगायतया सामग्री न्यायेमीया लागिं ई क्वःछिनाः पसः चायेके बियाच्वनागु धासें बजारय् वइपिनि दथुइ १ मिटरया सामाजिक दुरी कायम याकेत मार्किङ यायेगु ज्या जूगु नं वय्कलं धयादिल ।
खाद्यान्न लगायत अत्यावश्यक सामान न्यायेत नं छगू परिवारं छम्ह जक पिहां वयेत इनाप यानागु प्रजापतिं धयादि ।
सरसफाइपाखे विशेष ध्यान ब्युसें फोहरया व्यवस्थापन यायेगुया नापं सडकया नापं गल्ली, चोकचोकय् नं क्लोरिन स्प्रे यायेगु ज्या जूगु प्रजापतिया धापू खः ।
संक्रमणया अवस्थाया जिज्ञासाय् स्वाब परिक्षणया नितिं भक्तपुर अस्पतालय् व्यवस्था दुगु धासें आःतक्क संक्रमण खनेमदुनिगु वयकःया दावी खः ।
विदेशं वःपिनिगु धलः मुंकेगु झ्वलय् ८६म्हेसिगु नां मुनेधुंकूगु व सकलसित होम क्वारेन्टाइनय् च्वनेत निर्देशन बीधुनागु वयकलं जानकारी बियादिल ।
Categorized in राष्ट्रिय
