कोरोना संक्रमित प्यद्धः थ्यन
लहनान्युज | तछलागा चतुर्थी ११४०,जेठ २७ मंगलवाः
नेपालय् थौं तक प्यद्धः स्वयां अप्व मनूतय्त कोरोना भाइरसया संक्रमण खने दये धुकुगु दु ।
थौं स्वास्थ्य तथा जनसंख्या मन्त्रालयं नेपालय् संक्रमित पिनिगु ल्याः ४०८५म्ह थ्यंगु दु धका जानकारी बिःगु दु ।
अथेहे वंगु नीप्यघौया दुन थप ३२३म्हेसित थप संक्रमित जूगु धका धाःगु दु । मन्त्रालयया प्रवक्ता डा. जागेश्वर गौतमया कथं न्हूपिं संक्रमित जूपि मध्ये २९२म्ह मिजंपि व ३१म्ह मिसापि धका
धाःगु दु । नेपालय् थौं इलाम जिल्लाय् थप जूगु दु । थ्व नापं आ ७२गू जिल्लाय् कोरोनाया संक्रमण खने दये धुकुगु दु ।
येँया राष्ट्रिय जनस्वास्थ्य प्रयोगशालाय् याःगु परीक्षणय् धनुषाया २४म्ह, कपिलवस्तुया ७म्ह, महोत्तरीया ३म्ह, नवलपरासी पश्चिमया २२म्ह, नुवाकोटया २म्ह, रौतहटया २१, सर्लाहीया १६म्ह व सिरहाया १२म्ह यानाः १ सय २५म्हेसित संक्रमण खनेदुगु दु । देय्या थीथी थासय् याःगु परीक्षणय् थप १ सय ९८म्हेसित संक्रमणया पुष्टि जूगु खः ।
अथेहे ९६म्ह मनूत कोरोनामुक्त जुया अस्पतालं डिस्चार्ज जूगु दु ।
आः तक अस्पतालं डिस्चार्ज जूपिं ५८४म्ह थ्यंगु दु ।
