२०८१ आषाढ ११, मंगलबार

ख्वपय् यःसिं त्वधुलाः छम्ह सित

लहनान्यूज | चौलागा द्वितीया ११३७ (अप्रिल १३ २०१७)

बिस्काः जात्राया प्यन्हुगु दिं थौं ख्वपय् यःसिंख्यलय् यःसिं थनेगु झ्वलय् यःसिं त्वधुलाः छम्ह सीगु दु ।
 
थौं ख्वपया यःसिंख्यलय् ५५कु दुगु यःसिं थनेगु झ्वलय् यःसिं त्वधुलाः मेपिं न्याम्ह घाःपाः जूगु दु । घाःपाः जूपिंलय् स्वम्हेसिया अवस्था तच्वः दुगु धाःगु दु ।
 
घटनाय् लानाः सीम्हेसित म्हसीके मफुनिगु ख्वप प्रहरीं न्ह्यथंगु दु । प्रहरीया कथं घटनाय् घाःपाः जूपिन्त ख्वपया थीथी अस्पतालय् वासः यानाच्वंगु दु ।
 
घाःपाः जूपिंलय् सुर्यविनायकयाम्ह २२दँया सुमन तज, लिवालियाम्ह ५०दँया रामकृष्ण दुवाल, ख्वप–११याम्ह ४८दँया बालकृष्ण लीला, कमलविनायकयाम्ह ५३दँयाम्ह कृष्णभक्त दुवाल, नासमनायाम्ह २८दँयाम्ह सुरेन्द्र खाति लाःगु दु ।
 
घटना बहनीसिया ७ः१५ताः ईपाखे जूगु खः ।
 

 

थौं हे न्हूगु यःसिं थन

यःसिं त्वधूसां मेगु न्हूगु यःसिं नं थौं हे थनेमाःगु परम्परा कथं मेगु यःसिं नं थनेधुंकूगु दु ।
 
नागया प्रतीक नालीगु निकू हलिंपताःलिसेंया यःसिंयात अष्टमातृकाया प्रतीक नालीगु च्यापु खिपतं सालाः थंगु खः । थुगु यःसिंयाके तइगु विश्वनाथ भैरवया ध्वजाया नामं हे ‘विश्वध्वजा यात्रा’ खँग्वःया अपभ्रम्स जुयाः बिस्काः जात्रा जूवःगु संस्कृतिविदतय् धापू दु ।
 
बहनीसिया १०ताः ईपाखे यःसिं थनेत ताःलाःगु खः ।
 
थौं हे सुथय् ख्वपया कुमाः त्वालय् ल्हाः मदुगु यःसिं थनेधुंकाः सनिलय् यःसिंख्यलय् ५५कु हाकःया ल्हाः दुगु यःसिं थनेगु परम्परा दु । दँया लिपांगु दिनय् थनीगु यःसिं कन्हय् कुन्हु दँया न्हापांगु दिनय् क्वःथली ।
Categorized in राष्ट्रिय