गुठी विधेयक सामाजिक परम्परा अःखः डा.अजयक्रान्ति
नृपेन्द्रलाल श्रेष्ठ | बछलाथ्व एकादशी ११३९ (जुन १३ २०१९)
गुठी विधेयक विरुद्ध आन्दोलन न्ह्याना च्वंगु इलय् सत्तारुढ नेपाल कम्युनिस्ट पाटीया येँया सांसदपिं न थुगु विधेयकया विरुद्ध सः तयेगु शुरु याःगु दु ।
गुठी विधेयक भू–माफिया व भ्रष्ट कर्मचारी तयेगु षड्यन्त्र पाखे थुगु बिधेयक वःगु खः धका गुठी विधेयक विरुद्धय् येँया ९ पाखे निर्वाचित प्रदेशसभा सदस्य नाप नेकपाया नेता अजय क्रान्ति शाक्यं लहनान्युजयात धयादिगु दु ।
थुगु गुठी विधेयकय् मुख्य याना २३, २४ व ६० या दफा प्रति वयकलंः तीव्र असन्तुष्टि प्वकादिगु दु । सांसद शाक्यं थुगु बुँदा संशोधन मयोगु खःसा लिच्छवीकाल निसे न्ह्यानाच्वंगु सामाजिक, सास्कृतिक व धार्मिक परम्परायात कःघाना वया च्वंगु गुठी प्रणाली आः सिधइ धका तक धयादिगु खः ।
वयकलं परम्परानिसे न्ह्याना वयाच्वंगु गुथि आ वयेत्यःगु विधेयक हुवहु हे संसद पारित यातकि सामाजिक परम्परा, सस्कृति व धर्म दक्को हे समाप्त जुइ धका लहनान्युजयात धयादिगु खः । विधेयकया दफा २३.१ थुगु ऐन शुरु जुइ न्ह्यः हे छुट गुठी व सार्वजनिक गुठी थुगु ऐन प्रारम्भ जुलकि स्वतः राजगुठीइ परिणत जुइगु धका उल्लेख याना तःगु दफायात संशोधन याये माःगु आवश्यक दु धका वयकलं धयादिगु दु ।
अथेहे, उपदफा (१)य् राजगुठीइ परिणत जुइगु छुट गुठी व सार्वजनिक गुठीया चल अचल सम्पत्ति, जायजेथा, द्यःपिनिगु प्रतिमा दुपिनिगु गुठीयारया हक व दायित्व प्राधिकरण दइगु बिधेयकय् उल्लेख याना तःगु बुँदा न संशोधन आवश्यक जुगु वयकःया धापु दु ।
सांसद् शाक्यं गुठीया नामय् जुइगु भ्रष्टाचारयात अन्त्य यायेगु ऐन आःया आवश्यक दुगु दु धयादिसे थुगु बिधेयक भू–माफिया व भ्रष्ट कर्मचारी तयेगु षडयन्त्रपाखे वःगुथे खने दुगु धका लहानान्युजयात धयादिगु दु ।
