चःमति नेवाः सनिलय् जुजुकाजीयात हनीगु
लहनान्यूज | चौलाथ्व षष्ठी ११३७ (अप्रिल २ २०१७)
चःमति नेवाः खलकं लोकंव्हाःपिं नेवाः कलाकारतयगु लाइभ न्ह्यब्वया लिसें सांगितिक ज्याझ्वः ‘चःमति नेवाः सनिल’ याइगु जूगु दु ।
खलकं थौं येँय् छगू पत्रकार सम्मेलन यासें संगीतकार जुगल डंगोलया याकः लय् व म्ये च्वमि पुर्णकाजी ज्यापुया याकः च्वसाय् सांगितिक ज्याझ्वः यायेगु जानकारी ब्यूगु खः । पत्रकार सम्मेलनय् नवासें खलःया न्वकू मन्दिरा महर्जनं १७म्ह वाद्यवादकपिं लिसें लोकं व्हाःपिं गायक गायिकापिन्सं लाइभ म्ये न्ह्यब्वइगु धयादिल ।
लिसें उगु हे ज्याझ्वलय् नेपाः डान्स एकेदमिपाखें लाइभ म्यूजिकय् हे हुलाप्याखं नं न्ह्यब्वइगु धाःगु दु । म्यूजिक ट्र्याकय् सिमित जुया वनाच्वंगु नेवाः सांगितिक गतिविधिया दथुइ स्वकुमिपिन्त न्हूगु सवाः बी कथं लाइभ म्येया नापनापं लाइभ म्यूजिकय् हे हुलाप्याखं तकं न्ह्यब्वयेत्यनागु ग्वसाः खलकं न्ह्यथंगु दु ।
खिं, धिमेय् थुज्वःगु मौलिक नेवाः बाजंयात नं आधुनिक पहलं थुगु ज्याझ्वलय् न्ह्यब्वयेत्यनागु संगीतकार जुगल डंगोलं धयादिल । मौलिक लोक बाजंया संरक्षण लिसें थुकियात ल्यायम्ह पुस्ता दथुइ यंकेत छगू प्रयोग यायेत्यनागु संगीतकार डंगोलया धापू खः ।
नेवाः संगीत ख्यःया विकास व जागरण हयेत थुगु ज्याझ्वःया ग्वसाः ग्वयेत्यनागु खलःया नायः पुर्णकाजी ज्यापुं धयादिल । लिसें नेवाः संगीत ख्यःया विकास व उत्थानय् बियादीगु योगदानया कदर यासें निम्ह वरिष्ठ संगीतकःमिपिन्त हनेत्यनागु नं नायः ज्यापुं जानकारी बियादिल ।
ज्याझ्वलय् वरिष्ठ म्येहालामि जुजुकाजी रंजितयात ‘चःमति नेवाः संगीत हना’पाखें हनेत्यनागु नायः पुर्णकाजीं धयादिल । मेम्ह वरिष्ठ म्येहालामि रमेश ताम्राकारयात नं विशेष हनालिसें हनेगु वयकलं धयादिल ।
थीथी सांस्कृतिक लिसें सामाजिक ज्याखँत याना वयाच्वंगु चःमति नेवाः खलकं दक्कले न्हापांगु खुसी लाइभ ज्याझ्वः यायेत्यनागु ग्वसाः खलकं न्ह्यथंगु दु । लिसे थुगु कथंया सांस्कृतिक अले हना ज्याझ्वःयात दँय्दसं याना वनेगु योजना दुगु नं खलःपाखें धाःगु दु ।
थ्व हे चौलाथ्व द्वादशी (चैत २६ गते) शनिबारया दिनस येँया प्रज्ञा भवनय् चःमति नेवाः सनिल ज्याझ्वः जुइत्यंगु दु ।
Categorized in मनोरन्जन
