चीनं मेगु १६गू लखः डोज नेपाःयात बिइगु
लहनान्यूज | दिल्लागा षष्ठी ११४१,साउन १५ शुक्रवाः
चीनं कोभिड–१९ विरुद्धया खोप नेपाःयात मेगु १६गू लखः डोज बिइगु न्ह्यथंगु दु ।
थौं अर्थमन्त्री जनार्दन शर्मालिसे नापालय्ज्याय् चिनियाँ राजदूत होउ यान्छीं उगु परिमाणया खोप उपलब्ध यायेगु बचं बिउगु खः । चीनं थ्वयान्ह्यः नेपाःयात १८गू लख डोज खोप अनुदानय उपलब्ध याकेधुंकूगु दु ।
अर्थ मन्त्रालय कथं चीनं बिइ धाःगु खोप याकनं हे वइगु धाःगु दु । नापलय्ज्याय् अर्थमन्त्री शर्मां चीनपाखें खोप न्यायेगु प्रक्रिया न्ह्याकाच्वनागुलिं अपुकाबिइत इनाप नं यानादिगु खः । चिनियाँ लगानीइ न्ह्यनाच्वंगु सतक, जलविद्युत, विमानस्थललिसेंया निर्माणाधिन परियोजना क्वचायेकत नेपाल सरकारं यायेमाःगु ज्याया बारे गम्भीरताकथं ध्यान नं बिइगु धाल ।
नापालय् ज्याय् चिनियाँ राजदूत यान्छीं नवनियुक्त अर्थमन्त्री शर्मायात भिन्तुना लःल्हासें न्ह्यागु सरकार वःसां नेपाःप्रतिया नीति व दृष्टिकोणय् छुं नं ह्यूपाः मवइगु धयादिल । भुकम्पलिपाया पुननिर्माणय् नं चीनं नेपाःयात थीथी २५गू परियोजनाय् ग्वहालि यानाच्वंगु दु ।
गुकिइ बच्छि धैथें ज्या क्वचाय्धुंकूगु न्ह्यथंसें राजदूत यान्छीें दरबार हाइस्कुलया पुननिर्माण क्वचाःगु, वसन्तपुरया नौ तले दरबारया ज्या अन्तिम चरणय् जुयाच्वंगु ल्यंदनिगु परियोजनाया ज्या याकनं हे क्वचाइगु भलसाः बिउगु मन्त्रालयं न्ह्यथंगु दु ।
