२०८० चैत्र १५, बिहिबार

चैतया न्हापांगु वालय् पार्टी एकता जुइगु : माओवादी नायः दाहाल

ने.सं. ११३८ चिल्लागा पारु (२ मार्च २०१८), शुक्रवाः

नेकपा माओवादी केन्द्रया नायः पुष्पकमल दाहालं संघीय समाजवादी फोरम नं सरकारय् सहभागी जुइगु धयादीगु दु । 
 
अछाम थ्यंकादीम्ह नायः दाहालं पत्रकारतलिसे खँल्हाबँल्हा यानादिसें फोरम सरकारय् सहभागी जुइगु सहमति जुइधुंकूगु धयादीगु खः । उपेन्द्र यादव नेतृत्वया उगु पार्टी सरकारय् सहभागी जुइधुंकाः संविधान संशोधनया प्रकृया न्ह्याकेत नेकपा एमाले व माओवादी केन्द्र तयार जुइधुंकूगु नं दाहालं धयादिल । मधेस आन्दोलनया झ्वलय् ल्ह्वंगु मुद्दायात राजनीतिक सहलह व सहमतिया लिधंसाय् संविधान भिंकीगु वय्कःया धापू खः ।
 
प्रधानमन्त्री तकं जुयादीधुंकूम्ह नायः दाहालं संघीय सरकारया पूर्ण जुइधुंकाः थःपिं सुशासन व समृद्धिलिसेंया विकास निर्माणया ज्याखँय् केन्द्रीत जुइगु नं धयादीगु दु । अनुशासन व विकास निर्माणया ज्यायात प्राथमिकता बियाः देशय् न्हूगु गति बीगु थःपिनिगु ग्वसाः दुगु नं धयादिल ।
 
नायः दाहालं नेकपा एमाले व माओवादी केन्द्र दथुइ एकता चैतया न्हापांगु वालय् जुइगु जानकारी बियादिसें राजनीतिक एजेण्ड व विधान दयेकेत नीस्वंगु निगू कार्यदलं फागुण २५ गते दुने प्रतिवेदन लःल्हायेधुंकाः पार्टी एकता जुइगु नं धयादीगु दु ।
Categorized in राष्ट्रिय