जग्गा न्याःपिं स्थानीय मनूत पीडित
लहनान्युज | सिल्लाथ्व त्रयोदशी ११४०
ताः ई न्ह्यवंनिसें भ्रष्टाचारया तःधंगु काण्ड कथं चर्चाय् वयाच्वंगु वालुवाटारस्थित ललितानिवास जग्गा काण्डय् अख्तियार दुरुपयोग अनुसन्धान आयोगं आपालं तःधंपिं मनूतय् विरुद्ध समेत मुद्दा दायरयाःगु झ्वलय् अन जग्गा न्यानाः छेँ दंपिं ३६ म्ह जग्गाधनीत धाःसा तःधंगु मारय् लाःवंगु खँ सीदुगु दु ।
थुगु जग्गाया लागि ३६ म्ह मनूतय्सं वंगु वि.सं. २०६३÷६४ सालय् भाटभटेनीया थुवाः मीनबहादुर गुरुङयाके वालुवाटारया जग्गा न्याना काःगु खः । उमिसं अन जग्गा न्याःबलय् थुकियात छगू आवास योजना कथं विकास यानातःगु खः । उगु आवास योजनायात नेपाल सरकारया मालपोत कार्यालय, नापी विभाग व काठमाडौं उपत्यका नगर विकास योजनां तकं लिखित भ्वं हे दयेकाः स्वीकृत यानातःगु खः ।
सरकारया फुक्क हे निकायपाखें हे छाप तयाः स्वीकृत यानातःगु आवास क्षेत्र जूगुलिं उमिसं अन जग्गा न्याःगु खः । उकी मध्ये गुलिखेसिनं छेँ नं दनेधुंकूगु दु । आः छेँ दनाः च्वं वनेत्यंगु इलय् वयाः थ्व जग्गा ला सरकारी जग्गा खः, भूमाफियातय्सं हिनामिना याःगु धकाः जग्गा मिउपिं व न्याःपिंत तकं ठग करार यासें कारवाही यायेत्यंगु खँ न्यनाः अन जग्गा न्याःपिं थ्व ३६ म्हं जग्गाधनीत मर्माहत जूगु दु ।
वालुवाटार आवास धइगु नां तयाः अन जग्गा न्याःपिं थ्व ३६ म्ह मध्ये २९ म्ह येँया स्थानीय नेवाःत खः । थःपिंसं अन जग्गा न्यानाबलय् गुलिस्यां मेथाय् च्वंगु छेँ व बुँ मियागु, गुलिस्यां बैंकय् त्यासा कयागु खँ पीडिततय्सं धाःगु दु । अथे दुःख यानाः न्याना तयागु जग्गा आः वयाः अनियमित तरिकां न्याना काःगु धासें थःपिंत अनं उठिबास यानाः सुकुम्बासी दयेकेत्यंगु गुनासो नं उमिसं याःगु दु । गुलिखे जग्गाधनीत छेँ दने धुंकूसां नं च्वं वने ग्यानाच्वंगु खँ नं धाःगु दु ।
थःपिनि थ्व समस्या ज्वनाः थुपिं पीडितत थौंकन्हय् नेपाल सरकारया थीथी निकायय् वनाः दुःख प्वंकेगु यानाच्वंगु दु । थ्व झ्वलय् उमिसं येँ मनपाया मेयर लिसें थीथी सांसदपिंत नं नापलानाः समस्या कनेधुंकूगु दु ।
ललितानिवासया हे जग्गा न्याना काःगु कारणं सत्तारुढ दल नेकपाया महासचिव बिष्णु पौडेल नं विवादय् वःगु खः । तर अख्तियारं पौडेलयात धाःसा कारवाही मयाः । पौडेलं थम्हं न्याना तयागु जग्गा सरकारयात लित बिउगु कारणं वय्कःया विरुद्ध मुद्दा तयेम्वाःगु खँ अख्तियारं धाःगु खःसा थुकिं यानाः अख्तियार समेत विवादय् लाःगु खः ।
तर अन हे जग्गा न्याःपिं मेपिं सर्वसाधारणं धाःसा थःपिंसं जीवनभर कमे यानागु सम्पत्ति मुंकाः जग्गा न्याना तयागु जूगुलिं बिष्णु पौडेलं थें सुम्क सरकारयात लित बी फइगु अवस्था मदुगु खँ धाःगु दु ।
