२०८० चैत्र १५, बिहिबार

जमैका तलाबाज बुत

लहनान्युज | ञंलाथ्व १५ ११४०,भाद्र १७ बुधवाः

क्यारेवियन प्रिमियर लिग (सीपीएल) क्रिकेटय् जमैका तलाबाज बुगु कासाय् नेपाली बलर सन्दीप लामिछानें छगु विकेट काःगु दु । मंगलवाः चान्हय जूगु कासाय् जमैका ट्रिनबागो नाइट राइडर्स नाप १९ रनं बुगुलि सन्दीपं छगू विकेट काःगु खः ।
 
ब्रायन लारा स्टेडियमय् नाइट राइडर्सं बिःगु १८५ रनया लक्ष्यय् जमैकां २० ओभरय् ६ विकेटय् १६५ जक दयेकेत ताःलागु खः । आन्द्रे रसेलया अविजित अर्धशतकीय २३ बलय् ५ चौका व ४ छक्काया ग्वाहालि ५० रन दयकुगु खः ।
 
अथेहे ग्लेन फिलिप्सं ४१ रन, एनक्रुमां २६ व कार्लोस ब्रेथवेटं अविजित २१ रन दयकुगु खः । नाइट राइडर्सया फावद अमहेदं निगु विकेट व सुनिल नाराइन, डिजे ब्राभो, क्यारी पियरे व होसेनं छगु छगु विकेट काःगु खः ।
 
व स्वया न्ह्यः टस बुया न्हापां ब्याटिङ यापि नाइट राइडर्सं २० ओभरय् ४ विकेटया क्षतिइ  १ सय ८४ रन दयेकुगु खः । अपराजित यात्रा कायम हे याना नाइट राइडर्सया लागि कोलिन मुन्रों ६५ रनया योगदान बिःगु खः ।
 
कप्तान पोलार्डं अविजित ३३, सुनिल नाराईनं २९ व लेन्डेल सिमोन्सं २५ रन दयकुगु खः । जमैकाया लागि कार्लोस ब्रेथवेटं निगु विकेट व सन्दीप, फिडेल इडवर्डं छगु छगु विकेट काःगु खः ।
सन्दीपं थुगु सीपीएलय् न्ह्यगु कासय् १० विकेट काःगु खः ।
Categorized in कासा