जसपाया कचवं ज्यंकेत आयोगं निगुलिं पक्षयात सतल
दिल्लागा द्धितिया ११४१, साउन ११ सोमबाः
जनता समाजवादी पार्टी नेपाल जसपाया विवाद ज्यंकेत निर्वाचन आयोगं थौं निगुलिं पक्षयात सःतूगु दु ।
नायःद्वय महन्थ ठाकुर व उपेन्द्र यादवलिसें केन्द्रीय कार्यकारिणी समितिया दुजःतय्त आयोगं सःतूगु खः । जसपाय् ५१ दुजःया केन्द्रीय कार्यकारिणी समिति दु । नायः यादवं थःगु पक्षय् बहुमत केन्द्रीय कार्यकारिणी समिति दुजः दुगुलिं जसपा थःपिनिगु खःगु दाबी यानादीगु दु ।
ठाकुर पक्षं नं जसपा थःपिनिगु हे जुइमाःगु धयाच्वंगु दु । निगुलिं पक्षं दाबी यायेधुंकाः जसपा आधिकारिकताय् विवाद दु । पार्टी आधिकारिकताबारे विवाद लिपा सुनुवाइ यानाच्वंगु निर्वाचन आयोगं थौं केन्द्रीय कार्यकारिणी समितिया दुजःतय् ल्हाःचिं सनाखत यायेत्यंगु दु ।
नायः ठाकुरं आयोगं केन्द्रीय कार्यकारिणी समिति दुजःतय्त सःतूगु विरूद्ध सर्वोच्चय् रिट बियादीगु खः । तर सर्वोच्चं ठाकुरया माग कथं अन्तरिम आदेश बीत अस्वीकार यानाब्यूगु दु ।
Categorized in राजनीति
