जागरुकया प्यक्वःगु हिदान ज्याझ्वः क्वचाल
बिकाश | अनलागा अष्टमी ११४० (२०७७ असोज २४) शनिबार
जागरुक युवा समाजं येँय् प्यक्वःगु खुसी हिदान ज्याझ्वः याःगु दु । समाजं येँ महानगरपालिका २४ वडालिसेया मंकाः ग्वसालय् वंगु शनिबाः येँया इतुम्बहालय् हिदान ज्याझ्वः याःगु खः । ब्लड डोनर्स एशोसिएसन नेपाल (ब्लोदान) या आह्वानय् समाजं हिदान ज्याझ्वः याःगु खः ।
उगु हिदान ज्याझ्वलय् मुक्कं २१म्हेसिनं हिदान याःगु खः ।
लिपांगु इलय् जागरुक युवा समाज विशेष यानाः येँया पुलांगु वस्तीइ फुटपाथ पसः चीकेगु अभियानय् सक्रिय जुयावःगु दु । आः महामारीया इलय् सुं नं विरामीं हिया अभावया हुनिं ज्यान मवनेमा धकाः समाजं हिदानयात नं प्राथमिकताय् तयाः हिदान ज्याझ्वः यानावयागु समाजया सह सचिव लिसें हिदान ज्याझ्वःया कजि राजीव श्रेष्ठं धयादिल ।
‘छगू ला महामारीया अवस्थाय् हिया माग नं अप्वःगु खनेदुसा मेखे मजिमगाःगु ज्याबाहेक सर्वसाधारण मनूत काचाक्क छेँय् नं पिहां मवइगु अवस्थाय हिया अभाव जुइगु सम्भावना नं दु,’ सह सचिव श्रेष्ठं धयादिल । ‘अथेजुयाः हे थन हिया अभाव जुइकेमबीत जिमिसं मदिक्क धइथें हिदान ज्याझ्वः यानावयागु दु ।’
सामाजिक दुरी कायम यासें स्वास्थ्य सुरक्षा मापदण्डयात लिनाः हिदान ज्याझ्वः याःगु खः । ज्याझ्वःयात सुरक्षित ढङ्गं क्वचायेकेत ब्लोदानया लागिं व्यक्तिगत सुरक्षा उपकरण (पिपिई), मास्क व सेनिटाइजर लिसेंया सुरक्षा ज्वलंत येँ महानगरपालिका २४ वडाया वडाअध्यक्ष बालकृष्ण श्रेष्ठं ग्वाहालि यानादीगु ग्वसाः खलकं जानकारी ब्यूगु दु ।
‘हि धइगु वासः थें बजारय् वनाः न्याये नं फइमखु, धयाकथं दयेत थाकुइ नं फु,’ २४ वडाया सदस्य लिसें ब्लोदानया केन्द्रीय दुजः व जागरुकया सल्लाहकार विनोद तुलाधरं धयादिल । ‘थौंया विषम परिस्थितीइ हिया अभावं सुयां नं अकालय् मृत्यु मजुइमा धकाः जिमिसं हिदान ज्याझ्वःयात नं प्राथमिकताय् तयाः मदिक्क धइथें हिदान ज्याझ्वः यानावइगु दु ।’
ज्याझ्वलय् केन्द्रिय रक्त संचार सेवाया निर्देशक डा.मनिता राजकर्णिकार, केन्द्रीय नायः सानुबाबु प्रजापति लिसें ब्लोदानया पदाधिकारी, दुजःपिनिगु उपस्थिती दुगु खः ।
समाजं थ्वयां न्ह्यः नं येँया थँहिति, त्यःर, पुलां धःको लिसेंया थासय् हिदान ज्याझ्वः यायेधुंकूगु दु ।
Categorized in राष्ट्रिय
