जेलय् दुपिं मिसातयगु नितिं सांस्कृतिक ज्याझ्वः
लहनान्यूज | चौलाथ्व षष्ठी ११३७ (अप्रिल २ २०१७)
जेलय् दुपिं मिसातयगु सशक्तिकरण व आर्थिक सचेतनाया लागिं ग्वाहालि यायेत ‘नेवाः सांस्कृतिक ज्याझ्वः व झ्वःभ्वय्’ याइगु जूगु दु ।
अग्रशील महिला संस्था (लिडिङ वूमेन एशोसिएसन), राष्ट्रिय उपभोक्ता मञ्च अले सजेना क्राफ्टया मंकाः ग्वसालय् वइगु चौलाथ्व एकादशी (चैत्र २५ गते) शुक्रबाः पाटन म्यूजियम् उगु ज्याझ्वः जुइत्यंगु खः । थौं यलय् पत्रकार सम्मेलनया ग्वसाः ग्वयाः जापानी राजदूत मासासी ओगावाया मू पाहांसुइ ज्याझ्वः जुइथु जानकारी ब्यूगु खः ।
ज्याझ्वलय् लोकंव्हाःपिं म्येहालामिपिनिगु म्ये लिसें रुद्राक्ष ब्याण्डपाखें जलतरंगय् लोक अले शास्त्रीय धुन न्ह्यब्वइगु धाःगु दु । उकिया लिसें स्वजन रघुवंशी व पुचलं चर्या प्याखं नं न्ह्यब्वइगु जूगु दु ।
उगु हे ज्याझ्वलय् मचा कलाकारपिं टुलिप श्रेष्ठ व सजेना महर्जनया हुलाप्याखं नं न्ह्यब्वइगु ग्वसाः खलकं धाःगु दु ।
ग्वसाः खलः संस्था लिडिङ वूमेन एशोसिएसनं मिसातयगु सशक्तिकरण अले सीप विकासया ज्याझ्वःत याना वयाच्वंगु दु । सजेना क्राफ्टं वन्दी मिसातयसं उत्पादन याःगु ज्वलंत न्यायेगु धाःगु दु ।
