अमेरिकाय् टोर्नाडों तच्वकं लिच्वः लाःगु ६ गू राज्यय् भग्नावशेषय् ल्हानाच्वंपिनि मालेज्या व उद्धारया कुतः जुयाच्वंगु दु ।

शक्तिशाली टोर्नाडों ६गू राज्यय् म्होतिइ ९४म्ह सीगु दु । आपालं सर्वसाधारण अझं वेपत्ता दूगु बीबीसीं न्ह्यथंगु दु । उमिगु जीवितय् उद्धारया संभवाना तसकं म्हो जूसा नं उद्धारकर्मीतयेसं कुतः न्ह्यानाच्वंगु धाःगु दु ।

केन्टकी लिसेंया ६ गू राज्यय् म्होतिइ ३०गू टोर्नाडोया हुनिं तःधंगु मानवीय लिसें भौतिक क्षति जूगु खः । केन्टकीइ म्होतिइ ८०गू लिसें आःतक्क म्होतिइ ९४म्ह सीगु अमेरिकी सञ्चारमाध्यमं न्ह्यथंगु दु ।

टोर्नाडोया हुनिं केन्टकी, अर्कान्सा, इलिनोइ, मिजुरी, मिसिसिपी व टेनिसीइ जनजीवनय् लिच्वः लाःगु दु । सीपिनि ल्याः सच्छि सिवें अप्वः थ्यनिगु ताकं याःगु दु । टोर्नाडों सीमतः उद्योग लिसेंयात ध्वस्त याःगु दु ।

दुंगु भग्नावशेषय् उद्धारकर्मीं तक्यंपिनि मालेज्या जुयाच्वंगु दु । केन्टकीया मेफिल्ड टाउन टोर्नाडोया हुनिं दक्वःलय् अप्वः लिच्वः लाःगु दु । टोर्नाडोया हुनिं सच्छि अप्वः उद्योगय् लिच्वः लाःगु बुखँय् न्ह्यथनातःगु दु ।

टोर्नाडोया हुनिं मत लिसें लःया सेवाय् नं लिच्वः लाःगु दुसा द्वलंद्वः मनूत लः व मतया अभावय् लाःगु दु ।

Categorized in अन्तर्राष्ट्रिय