डुबानया समस्या ज्यंकेत भारत सरकारलिसे सहकार्य यायेमाःगु
लहना न्यूज | ने.सं. ११३९ गुंलागा पञ्चमि (२० अगष्ट, २०१९), मंगलवाः
नेपाल कम्युनिष्ट पार्टी (नेकपा)का नायः पुष्पकमल दाहालं नेपालय् जुइगु डुबानया समस्या ज्यंकेगु नितिं भारत सरकारलिसे सहकार्य यानाः न्ह्याः वनेमाःगु धयादीगु दु ।
जिल्ला विपद् व्यवस्थान समितिया मुँज्याय् थौं मंगलवाः न्ववानादिसें नायः दाहालं उगु खँ धयादीगु खः । वय्कलं नेपालय् दँय्दसं वर्षाया इलय् वइगु खुसिवाःपाखें तःधंगु जनधनया खति जुइगु नं धयादिल ।
पूर्व प्रधानमन्त्री तक जुयादीम्ह नेकपाया नायः दाहालं लःया समस्या नेपाःया जक मजूसें भारतया तकं जूगुलिं निगुलिं देसया सरकारं समन्वय यानाः न्ह्याःवनेमाःगु धयादिल । थुकिया नितिं नेपाल सरकारं पहल नं याःगु नायः दाहालया धापू दु ।
भारतपाखेया सीमाय् दयेकीगु तटबन्धलिसें बाँधया हुनिं दकलय् अप्वः समस्या प्रदेश २स जुइगु जूगुलिं सरकार थुगु समस्या ज्यंकेगु नितिं गम्भीर दुगु नं धयादिल ।
थुगुसी वःगु खुसिवाःपाखें जुइफइगु तःधंगु जनधनया खति पनेत सम्बन्धित निकायपाखें इलय् हे तदारुकता क्यंगुलिं नायः दाहालं लसता तकं प्वंकादिल ।
उगु मुँज्याय् ब्वति कयादीम्ह पूर्व प्रधानमन्त्री नापं नेकपाया वरिष्ठ नेता माधवकुमार नेपालं विपदयात कयाः राजनीति मयायेत फुक्क पक्षयात इनाप यानादिल । वय्कलं विपद् व्यवस्थापनया नितिं सरकार नेपाल सरकार गम्भीर जूगु खँ धयादिसें थःपिन्सं तकं थुकिया नितिं सरकारयात दबाब बिया वयाच्वनागु जानकारी याकादिल ।
Categorized in राष्ट्रिय
