ताःलाःगु ‘डिभिजन टु मिसन’
प्रजीत शाक्य
नेपाःया क्रिकेट टिमया आइसीसी विश्व क्रिकेट लिग ‘डिभिजन टु’या यात्रा थाहांकुहां जूसां लुमंके बहःगु कथं जुल । ‘डिभिजन टु’या शीर्ष निगू थासय् च्वंगु टिम वइगु मार्चय् जिम्बाबेय् जुइगु सन् २०१९ या विश्वकप एकदिवसीय कासाया अन्तिम ल्यज्या कासा म्हिते दइगु प्रावधान दुगु जुल ।
नेपाः अपेक्षा अःखः शीर्ष थासय् हे च्वनाः विश्वकपया ‘ग्लोबल ल्यज्या’ कासा म्हितेत योग्य जुल । अथे खःसां उगु कासा लिपा फाइनलय् युनाइटेड अरब इमिरेट्सलिसे बुइवं नेपाः उपविजेता सीमित जुल ।
थुगुसी नेपाःपाखें तःधंगु अपेक्षा मयाःगु खः । निदँतक न्ह्याःगु विश्व क्रिकेट लिगय् च्यागू मध्ये न्हय्गूगु थासय् च्वनाः ‘डिभिजन टु’स कुहांवइगु खँ हे नेपाःया टिमयात कयाः सशंकित जुइमाःगु मू हुनिं खः । व बाहेक सन् २०१५य् नामिबियाय् हे डिभिजन टु म्हितूगु इलय् प्यंगूगु थासय् लाःगु खः । अझ देशया सर्बोच्च क्रिकेट संघ आइसीसीया प्रतिबन्धय् लानाच्वंगु दु ।
थौंकन्हय् धाय्गु खःसा घरेलु क्रिकेटय् एकदिवसीय क्रिकेटया वातावरण मदु हे धाःसां छुं पाइमखु । थ्व बाहेक आयोजक नामिबिया, क्यानाडा, युएइ, केन्या थेंजाःगु विश्वकपया हे अनुभवी टिम ‘डिभिजन टु’लय् दुगु खः । विश्वकप छनोटय् थ्यंकेत थःगु विपक्षय् दुगु थुगु फुक्क पक्षयात चीकाः न्ह्याः वने माःगुलिं नेपाःपाखें तःधंगु आशा मयाःगु खः ।
अझ नामिबियालिसेया न्हापांगु कासाय् १३८गू रनया सामान्य लक्ष प्राप्त याय्गु झ्वलय् छगू विकेटया क्षती बल्लतल्ल कासा त्याकूगु नेपाःया टिमयात कयाः म्हो मनूयाके जक विश्वास ब्वलंगु खः । नेपालं कासा ला त्याकल, तर उगु कासा च्यागू विकेटया क्षती नाटकीय कथं प्यंगू बल ल्यंदनीगु इलय् लक्ष प्राप्त याःगु खः ।
बसन्त रेग्मीं अन्तिम ओभरय् छक्का थ्वाय्वं जक नेपाःया उद्धार जूगु खः । निगूगु कासा ओमान विरुद्धया खः । नेपाःया ब्याटिङ्गं नामिबिया बिरुद्धया गल्तिपाखें शिक्षा काय् मफुत । थुगु कासाय् तुलनात्मक कथं कमजोर टिम नेपाल न्यय्गू ओभर नं म्हिते मफयाः १३८ गू रनय् आउट जुल । नेपाःया बलिङ्ग आक्रमणं ओमानयात लक्षपाखें तापाक्क तय्गु कुतः याःसां नं चीधंगु योगफल पराजयया कारण जुल ।
थुकथं थुगु निगू कासालिपा थुकथंया कमजोर ब्याटिङ्गया भलसाय् डिभिजन १ य् थाहांवनाः विश्वकप म्हितीगु म्हगस यक्वस्यां म्हंके त्वःतेधुंकूगु खः । नेपाःया ब्याटिङ्ग व लिपाया कासाय् नं बांलाः मजुल । स्वंगूगु कासाय् युएइ विरुद्धया विजय नेपाःया नितिं मेमेगु तुलनाय् भचा अःपुल । तर उकी नं ब्याटिङ्गया मखुसे बलिङ्गया योगदान खनेदत । नेपालं अन्तिम निगू कासा अन्तिम बलय् जक त्यात ।
केन्या विरुद्ध अन्तिम बलय् सोमपाल कामीं निगू रन व क्यानाडा विरुद्ध अन्तिम निगू बलय् करण केसीं छक्का थ्वाय्वं जक कासा त्याकेत ताःलात । क्यानाडा विरुद्धया कासा बूगु जूसा नेपाःया विश्वकप छनोटया यात्रा क्वचाइगु खः । उकिं नेपाःया भाग्य लिग चरणया अन्तिम बलय् करण केसीया चमत्कारं जक क्वःज्यूगु खः धाःसां पाइमखु । अझ बलिङ्गया भरय् नेपाल लिग चरणय् दक्कलय् सफल टिम जुल धाःसा नं अप्वः जुइमखु ।
टिम गेमय् व हे ताःलाइ, गुकी टिम वर्क दइ । थुगुसी नेपाःया सफलताय् थुगु धापू पाय्छि मजुल । न्हापाथें नेपाःया टिम कासाख्यलय् छधी छप्पँ जुयाः म्हिते मफुत । नेपाःया ब्वज्या प्यम्ह न्याम्ह कासामि व नं बलरय् जक निर्भर जुल । ब्याटिङ्गया खँ ल्हाय्गु खःसा कप्तान पारस खड्का व युवा ब्याट्सम्यान आरिफ शेख व रोहित पौडेलं छुं छुं कासाय् जक बांलाक्क म्हितल ।
दकलय् अप्वः आशा यानातःपिं ब्याट्सम्यान ज्ञानेन्द्र मल्ल व शरद भेषवाकर ‘फ्लप’ जूगुलिं ब्याट्सम्यान कमजोर जुल । भाग्य हे धाय्माः, नेपालं उकिया मू पुलेम्वाल ।
कप्तान पारसं धाःसा युएइ व केन्या विरुद्ध संकटया इलय् थःगु सामथ्र्य क्यन । युएइ विरुद्ध प्रतिकूल परिस्थितिइ दय्कूगु ५१ गू रन दय्कूम्ह पारसं फाइनलय् १०३ बलय् आउट मजूसे ११२ गू रन दय्कूगु खः ।
लेग स्पीनर सन्दीप लामिछाने नेपाःया नितिं ‘ट्रम्प कार्ड’ जुल । सन्दीपं थःगु लेग स्पीनपाखें कासाजःछि हे सनसनी यानाबिल । वंगु महिनाय् आइपीएलय् म्हितेत दिल्ली डेयरडेभिल्सं आबद्ध जुइधुंकाः विश्वया मिखाय् लानाच्वंम्ह सन्दीपं थुगु कासापाखें थःगु उचाइ थकाय्त ताःलात । वय्कलं प्रत्येक पटक विकेट कयाः टिमया उर्जा थकयाब्यूगु खः ।
लिग चरण क्वचाःगु इलय् सन्दीपं १६ गू विकेट कयाः दकलय् अप्वः विकेट काःम्ह कासामि जुल । अथे ला नेपाःया मेमेपिं बलरतय्त नं कुंखिनेगु थाय् मदु । अनुभवी स्पीनर बसन्त रेग्मी सन्दीपया किचलय् लाःवन । अथेखःसां बसन्तया बलिङ्गं नं प्रत्येक कासाय् नेपाःयात फाइदा जुल ।
स्वदँ न्ह्यः नामिबियाय् जूगु डिभिजन टु करण केसीया ‘डेब्यु’ कासा खः । गुकी करणं आशा याःगु स्वयां अप्वः योगदान याःगु खः । थुगुसी नं करण नायक जुल, लिग चरणया अन्तिम कासाय् क्यानाडा विरुद्धया थःगु ब्याटिङ्गं । क्यानाडा विरुद्ध वय्कःया जादुइ कासां नेपाः विश्वकपय् थ्यंगु धाःसां पाइमखु ।
सन्दीप दकलय् बांलाःम्ह कासामि, पारस दकलय् अप्वः रन दय्कूम्ह कासामि
नेपाःया सन्दीप लामिछाने कासाया हे दकलय् बांलाःम्ह कासामि जुइत ताःलाःगु दु । सन्दीपं मुक्कं १७ गू विकेट कयाः दकलय् अप्वः विकेट काःम्ह कासामिया धलखय् ओमानया विलाललिसे मंकाःकथं शीर्ष थासय् च्वनेत ताःलात । नेपाः कप्तान पारस खड्का नं मुक्क २४१ गू रन दय्काः दकलय् अप्वः रन दय्कूपिं कासामिया धलखय् न्हापांगु थासय् लाःगु खः । युएइया अस्फाक मुक्कं २३७गू रन कयाः निगूगु थासय् लात ।
विश्वकप छनोटय् नेपाः समूह ‘बी’इ
नेपाः व युएइ दथुइ जूगु फाइनल कासा विश्वकप छनोटया पुचः क्वःछीगु कासा नं खः । नेपाः उपविजेता जुइवं समूह ‘बी’इ लाःगु दु । उगु समूहलय् अफगानिस्तान, जिम्बाबे, स्कटल्याण्ड व हङ्गकङ्ग लानाच्वंगु दु ।
युएइ लाःगु समूह ‘ए’स वेस्ट इण्डिज, आयरल्याण्ड, नेदरल्याण्ड व पपुआ न्यूगिनी लानाच्वंगु दु । निगुलिं पुचलय् शीर्ष स्वंगू थासय् च्वंगु टिमं सुपर सिक्स म्हिती । व लिपा समूह चरण व सुपर सिक्सय् काःगु ल्याः जोडे यानाः शीर्ष निगू थासय् लाःगु टिम विश्वकप २०१९य् म्हितेत योग्य जुइ ।
