थुगुसी नं पृथ्वीनारायणयात थुकलं बिल
थौं पृथ्वीनारायण शाहया बुदिंयात गुलिसिनं एकता दिवसया रुपय् हनेमाः धयाच्वंबलय् किपुलिइ धाःसा पृथ्वीनारायण शाहयात थुकलं बीगुलिसें किपुलिइ लडाईंया इलय् पृथ्वीनारायण शाह चुल्लुयाः दःगु ल्वहंयात लुमंकूगु दु ।
 
नेवाः प्रदेशय् आदिवासी जनजाति जागरण अभियानं थौं किपुलिइ छगू ज्याझ्वःया ग्वसाः ग्वसें किपूया छ्याकं ल्वहँतय् थुकलं बिल । किपूमिपिनिगु उगु लं जुइबलय् पृथ्वीनारायण शाह व वं किपूमिपिन्त याःगु अत्याचारयात लुमंकाः उगु ल्वहंतय् थुकलं बीगु चलन दु ।
 
किपूया छ्याकः ल्वहं
 
व धुंकाः अभियानया पुचः किपुलिइ लडाईंया इलय् पृथ्वीनारायण शाह चुल्लुयाः दःगु चुल्लू ल्वहंतक्क ब्यानरसहित र्याली वंगु खः । लडाईंलय् थःपिन्त साथ ब्यूगु ल्वहं धकाः किपूमिपिनि उगु चुल्लू ल्वहंयात द्यः भाःपियाः पुज्यायेगु चलन नं दु ।
 
पृथ्वीनारयण शाह चुल्लुयाः दःगु चुल्लू ल्वहं
 
अभियान पुचलं चुल्लू ल्वहं थ्यंकाः छगू सभा नं याःगु खः । सभायात सम्बोधन यासें किपूया अभियन्ता व पत्रकार नजरराम महर्जनं थौंतक्क पृथ्वीनारायण शाहयात थुकलं बियाः अले चुल्लू ल्वहंयात पुज्यानाः किपूमिपिन्सं थःगु पहिचानया सः थ्वयेकाच्वंगु दुगु धयादिल ।
 
अथे हे आदिवासी जनजाति वकिलतय् पुचः लाहुर्निपया छ्यान्जे शंकर लिम्बुं नेवाःत थःगु हे थासं विस्थापित जुया वनाच्वंगु खँ नेवाःतयसं वाःचायेकेमाःगु खँ कुलादिल । सडक विस्तारया नामय् अथवा विकासया नां बियाः स्वनिगःया थीथी थासय् नेवाःतयत विस्थापित यायेगु ज्या जुयाच्वनं नं नेवाःत दनामवःगु खँय् वयकःपिन्सं च्यूताः प्वंकादिल ।