थुगुसी येँया मजुइगु जुल
लहनान्युज | गुंलागा १४ ११४०,भाद्र २ मंगलवाः
जुइला वा मजुइला धइगु अलमलया दथुइ अन्ततः थुगुसी ईन्द्रजात्रा अर्थात येँयाः नं मन्याइगु हे जूगु दु । कोभिड १९ महामारीया मारय् तःगु नेवाः जात्रा व पर्वया दथुइ येँयाः नं लाइगु निश्चित जूगु दु । ईन्द्रजात्रा व्यवस्थापन समितिया नायः लिसें कुमारी माजुया चिताइदार गौतमरत्न शाक्यं थुगुसी पिने हुलमुल जुइगु छुं हे गतिविधि मजुइगु व दुने याय्माःगु जक पूजा यानाः जात्राया औपचारिकता पूवंकेगु धयादीगु दु । वय्कःया धापू कथं थुगुसी यःसिँ थनेगुनिसें थःनेयाः, क्वःनेयाः, नानिचायाः कथंया हुल मुनाः याय्माःगु जात्रा छुं हे मजुइगु निश्चित हे जूगु दु ।
छुं दिं न्ह्यः च्वंगु ईन्द्रजात्रा व्यवस्थापन समितिया वैठकय् नं दक्वसिनं धइथें थुगुसी जात्रा मयाय्गु हे बांलाइगु धाःगु खः । थ्वयां न्ह्यः अवस्थां साथ ब्यूसा जात्रा याय्गु नितिं तयारी नं जुयाच्वंगु खः । यःसिं हय्गु नितिं केन्द्रीय मानन्धर संघ व गुर्जु पल्टनया प्रतिनिधि यःसिँगुँइ वनाः ग्वंपुजा क्वचाय्केधुंकूगु दु । तर यःसिं थनेवं जात्रा न्ह्याका हे वनेमालीगु खनेदुबलय् यःसिं नं मथनेगु खँ
जूगु समितिया नायः शाक्यं कनादिल । नियमित रुपं जात्रा याय्गु खःसा भाद्र ३ गते यःसिं काःवनेमाःगु खः । ईन्द्रजात्रालिसे स्वानाच्वंगु २९ गुथिखलःतय् दथुइ सहलह जूबलय् यःसिँ थनाकथं वंगलय् आजुद्यः पिने तय् हे मालीगु अले थ्वलिसें धमाधम जात्राया गतिविधि माःहनावनीगु खनेदय्वं यःसिँ मथनेगु निर्णय जूगु खः ।
आः दुने याय्गु पूजा जक यानाः थुगुसीया जात्रा स्थगित हे याय्मालीगु स्थिती वःगु शाक्यं धयादिल । कुमारी, गणेश व भैरवयात तलेजुइ हयाः याय्माःगु पूजा नं कुमारीयात कुमारी छेँय् हे व गणेश व भैरवयात नं छेँय् छेँय् हे वनाः पूजा याय्गु निर्णय जूगु वय्कलं जानकारी बियादिल । थःनेयाः, क्वःनेयाः व नानिचायाःया दिनय् नं दुने याय्माःगु पूजा जक याय्गु वय्कःया धापू खः । थुकथं थुगुसीया येँयाः नं औपचारिकताय् हे सिमित जुइगु जूगु दु ।
लिपांगु दिनय् वयाः कोरोनाया इपिसेन्टर हे स्वनिगः व उकीसनं दक्कले आपाः येँय् हे संक्रमित खनेदयाच्वंगु ल्याखं नं थुगुसी जात्रा याय्गु धइगु हे तःधंगु जोखिम फय्गु ज्या जुइगु खनेदु । लिपांगु छुं दिंया तथ्याङ्कयात स्वय्गु खःसा दक्कले आपाः संक्रमित लुयाच्वंगु थाय् हे येँ जुयाच्वंगु दु । न्हिं सच्छिया हाराहारीइ हे थन संक्रमित खनेदइगु जुयाच्वंग दु । थज्याःगु अवस्थाय् जात्रा याय्बलय् संक्रमण झन न्यनावनेफुगु व थन संक्रमण न्यंगुया दोष हे येँयाःयात वनेफुगु सम्भावना आपाः दु ।
खतुं स्वनिगलय् संक्रमण अप्वः न्यनावंगु खँय् सरकारया तःधंगु हे कमजोरी दु । लकडाउनया इलंनिसें हे स्वनिगःया मेयरपिन्सं स्वनिगःया नाका शिल्ड याय्माःगु माग संघीय सरकारयात तयावःगु खः । आः नं उपत्यका नगरपालिका फोरमं थुगु माग लिसा कयाच्वंगु दनि ।
स्वनिगःया नाका शिल्ड धाःसां व्यवहारिक रुपं जुयाच्वंगु मदु । लकडाउनया उल्लंघन यानाः पिने जिल्लां येँय् दुहांवःपिं गुलिसिनं नाकाया प्रहरीयात धेबा नकाः वयागु धाःगु नं न्यनेदुसा गुलिसिनं मन्त्रीया हे पावर क्यनाः दुहांवःगु न्यूजत नं पिहांवःगु दु । उलि जक मखु, मन्त्री व सांसदतय्सं हे लकडाउनयात पालना मयाःगु खनेदु । थज्याःगु प्रवृत्तीया लिच्वः कथं आः कोरोनाया हटस्पट येँ जूगु दु ।
थ्व ल्याखं गुलिसिनं मन्त्रीतय्सं न्ह्यागुं याय्ज्यू, झीगु जात्रा न्याय्केमज्यूला धकाः सामाजिक संजालया अंगलय् च्वःगु नं खनेदत । तर मेपिन्सं गलत यात धाय्वं तुं झीसं नं गलत याय्गु खँ ल्हाय् पाय्छि जुइला बिचाः याय्माः । उकिया नापं यदि जात्रा वा पर्वया नामय् झीसं हुलमुल यानाः थन संक्रमण न्यन धाःसा उकिया लिच्वः अप्वः फय्माःपिं नं झी हे खः ।
ईन्द्रजात्रा व्यवस्थापन समितिया दथुइ सावधानि नालाः सुरक्षित तवरं जात्रा न्याय्केगु खँ नं मजूगु धाःसा मखु । सुरक्षित कथं जात्रा न्याय्केगु विधि अले राज्यं सुरक्षाया ल्याखं म्हितेमाःगु भूमिका आदि दुथ्याकाः १२–१३ बुँदासहितया सुझाव नं तयार याःगु खः । थःगु हे सुझावया ल्याखं जात्रा संचालन याय्गु खँय् थःपिं हे निश्चिन्त जुइमफूगु ईन्द्रजात्रा व्यवस्थापन समितिया नायः शाक्यं धयादिल । जात्रा धाय्वं हे सलंसः मनू मुनीगु निश्चित हे दुगु व थज्याःगु अवस्थाय् जात्रा मयाय्गु हे बांलाइगु लिच्वलय् थःपिं थ्यंगु वय्कलं धयादिल ।
आः संक्रमण येँय् जक वा नेपालय् जक न्यनाच्वंगु मखु । मुक्कं हलिं हे कोरोना महामारीं आक्रान्त जुयाच्वंगु दु । थज्याःगु अवस्थाय् झी नं थुकिया मारय् लाःगु दु । सुनां छु यात व छु मयात धकाः मेपिन्त पतिं धस्वाकाच्वनेगु स्वयां संक्रमण नियन्त्रणय् थःपिन्सं याय्फुगु याय्गु हे बांलाइ । अय्जुयाः थुगुसी येँयाःया जात्रा स्थगित जुइगु मनं मयःगु खँ खःसा अवस्थाया ल्याखं पाय्छि पलाः हे धाय्मालीगु अवस्था दु ।
