थौं बौया ख्वाः स्वयेगु दिं
लहनान्यूज | गुंलागा चतुर्दशी ११४१, भाद्र २२ मंगलबाः
थौं बौया ख्वाः स्वयेगु दिं । थौं अबुयात हनाबना तसें साःगु भिंगु मरिचरि, वसः अले थीथी द्वहलपा बियाः अबुया ख्वाः स्वयेगु याइ ।
थौं तापाक्क च्वनाच्वंपिं सन्तान नं अबुयाथाय् वनाः ख्वाः स्वयेगु याइ । न्ह्याबलें हनातयेमाःम्ह अबुया थौं विशेष कथं हनाबना प्वंकुसें ख्वाः स्वयेगु याइ । अबु मदुपिनि धाःसा थौं येँया उत्तरपूर्वी भेगस्थित गोकर्र्र्णेश्वरय् वनाः श्राद्ध यायेगु याइ ।
गोकर्णेश्वरय् वनाः श्राद्ध याःसा पितृ ऋणंमुक्त जुइगु शास्त्रीय मान्यता दु । येँया गोकर्णेश्वर, नुवाकोटया बेत्रावतीलिसेंया पवित्र तीर्थस्थलय् श्राद्ध यायेगु याइ । अथे यायेबलय् थःगु छेँय्, पाजुपिनि छेँय्, व ससःपाखेया स्वंगू, स्वंगू पुस्ताया पितृं मोक्ष चूलाकीगु धार्मिक विश्वास दु ।
गोकर्णय् विशेष मेला जुइगु दिं जूगुलिं थौंया औंशीयात ‘गोकर्ण औँशी’ नं धायेगु याः ।थौंया दिनय् मदय्धुंकूम्ह अबुया नामय् पितृ तर्पण नं बीगु याइ । हिन्दू धर्मावलम्वीतय् थौं द्यः अले पितृ ज्याया लागिं मदय्कं मगाःगु वनस्पति कुश छेँय् छेँय् दुकायेगु याइ ।
वैदिक मन्त्रोच्चारणलिसें लिनाकाइगु कुश पुरोहिततय्सं जय्मांतय् छे्ँय् थ्यंकाबीगु चलन नं दु । थौं ल्यूगु कुश दच्छितक्क छ्यलेजीसा मेगु दिनय् लीगु कुश व हे दिनय् जक छ्यलेफइगु शास्त्रीय मान्यता दु ।
कुश दुकायेगु दिं जूगुलिं कुशे औंशी नं धायेगु याः ।
Categorized in राष्ट्रिय
