दिल्लीयात बुकाः कोलकाता आईपीएल टी–ट्वेन्टी क्रिकेटया फाइनलय्
कौलाथ्व नवमी ११४१, असोज २८ विहीबाः
दिल्ली क्यापिटल्सया बुकाः कोलकाता नाइट राइडर्स ईन्डियन प्रिमियर लिग (आईपीएल) टी–ट्वेन्टी क्रिकेटया फाइनलय् दुहांवंगु दु ।
युएईया सारजाहस वंगु चान्हय् जूगु निगूगु क्वालिफायरय् दिल्ली क्यापिटल्सयात ३ विकेटं बुकाः कोलकाता फाइनलय् थ्यंगु खः । कासाय् दिल्लीं ब्यूगु सच्छि व ३६ रनया आज्जु कोलकातां १९ ओभर ५ बलय् ७ विकेट तंकाः पूवंकल ।
कोलकातायात त्याकेत भेन्कटस एयरं ५५ रनया महत्वपूर्ण योगदान बिल । अथे हे, सुबमन गिलं ४६ रन दयेकल । दिल्लीया कागिसो रबाडा, एन्रिच नोर्किया व रविचन्द्र आश्विनं २÷२ विकेट काल ।
थ्वयां न्ह्यः न्हापां ब्याटिङ याःगु दिल्लीं २० ओभरय् ५ विकेट तंकाः सच्छि व ३५ रन दयेकूगु खः । उकिया लागिं शिखर धवनं ३६ रन अले श्रेयस एयरं अविजित ३० रन दयेकल । कोलकाताया वरुण चक्रवर्तीं २ विकेट काल ।
कोलकातां शुक्रबाः दुबईलय् जुइगु फाइनलय् चेन्नई सुपर किङ्सलिसे धेंधें बल्लाः याइ ।
Categorized in कासा