२०७७ माघ ८, बिहिबार

दुर्घटना याना फिल्मी शैलीइ लुकुब्यूपि ज्वन

लहनान्युज | ने. सं. ११३८ थिंलागा अमाई (डिसेम्वर १८, २०१७), यल ।

 
वंगु शनिवाः बहनी १० बजे यूएन पार्क कोरिडोरया लँय् छगू दुर्घटना जूल । लँजुवायात ठक्कर नकेवं उगु कारसहित चालकपिं बिस्यूवंगु खनी । 
 
दुर्घटनाया सूचं थ्यनेवं महानगरीय प्रहरी प्रभाग पुल्चोकया प्रहरी निरीक्षक गोविन्द पन्थीं थःगु मातहतया प्रहरीयात पुरा एरिया सिल यायेगु उजं बिया घटनास्थलय् थ्यंकवन । दुर्घटनां तच्वकं घाःपा जूम्ह मनूयात उपचारया नितिं अस्पतालय् त्वःता हाकनं घटनाया लिकलाःगु चुक मोडय् चेकजाँच तीव्र यानादिल । ठक्कर बिया बिस्यूंवंगु कार लुइकेत प्रहरीं चेकजाँच कडा रुपं न्ह्याकल । तर, घटनास्थलय् प्रत्यक्षदर्शी मदुगु जक मखु गाडीया नम्बर व गाडीया रंग गुजोगु धैगु तकं प्रहरीयात जानकारी मदूगु हुनिं ठक्कर ब्यूगु गाडी लुइके अपु मजुल । मेखेर, ठक्करं घाःपा जुम्हेसिया अवस्था धासा तसकं गम्भीर जुगु जुल ।  
 
छुं ई लिपा घटनास्थलय् च्वंच्वपिं प्रहरीलिसे निम्ह मनु वया लँय् गाः म्हुयातगुलिं दुर्घटना जूगु धका ल्वाः वयेगु ज्या जुुल । अय्लखं मात्तेजुपिं थुमिसं प्रहरीयात लाक्वः बोबिइगुुनापं घटनास्थलया भिडियो नं कैच्वंगु खनि ।
 
प्रहरी जवानपिंलिसे हाःवपिंत प्रहरी निरीक्षक गोविन्द पन्थीं सोधपुछ यायेवं थुपिं युवातयेसं थपिं झम्सिखेलपाखें न्यासेवया मीनभवन वनेत्येनागु धाल । शंकाया आधारय् थुमिगु खानतालासी लिपा निम्हमध्ये छम्हेसिया म्हिचाय् गाडीया ताःचा लुइवं गाडी गन दु धैगु न्ह्यसःलय् सिंहदरबारदुने उर्जा मन्त्रालय दुगु लिस ब्यूगु जुयाच्वन । 
इन्सपेक्टर पन्थीया शंका तच्वयेवं थुमित भ्यानय् तया, ठक्कर नकुगु गाडी गन यंका बिस्कातःगु आशंका याना सर्च एण्ड सिल याःगु क्षेत्रय् व नापंच्वंगु एरिया हाकनं कोथिइक मालेगु ज्या जुल । वहे झ्वःलय् ज्वागलया लँपूइ बा ४ च ६६३२ नम्बरया गाडी छगः न्ह्योनेया बोनट स्यंगु अवस्थाय् लुयावल । 
 
प्रहरीलिसे हाःवम्ह युवाया म्हिचाय् लूगु ताःचां गाडी चालेवं गाडीबारे हाकनं न्यनेकने यायेवं न्ह्यवलां थुमिसंं थपिंन्स मस्यूगु धाल । लिपा वया गाडी थःपिनिगु हे खः धका स्विकार यात तर थपिंसं दुर्घटना मयानागु दाबी यात । ‘थप अनुसन्धान यायेगु झ्वःलय् थपिन्सं हे ठक्कर नकागु खः धका स्विकार यात,’ इन्सपेक्टर पन्थी धयादिल, ‘दुर्घटनालिपा गल्लीदुने गाडी सुचुका थुपिं घटनास्थल हाकनं वःगु खनि ।’ 
 
प्रहरीया धापूकथं अनिसराज भण्डारी व आवास पोखरेल निम्हेसिनं गयावःगु कारं दुर्घटनास्थलंनिसें १० मिटर तापाक्क तक लँजुवायात घिस्रेजुइक दुर्घटना जुइवं बिस्युवंगु खः । गाडी भण्डारीं गयावःगु व पोखरेलं घटनाया तथ्य तप्वयेगु अपराधय् प्रहरीं थुमित ज्वना तःगु दु । गम्भीर घाइते जुम्ह जावेद खानया ट्रमा सेन्टरय् वासः जुयाच्वंगु प्रहरी जानकारी ब्यूगु दु । 
 
अपराधय् संलग्न मनुतयेसं थःम्हं यानागु अपराधया घटनास्थलय् हाकनं हाकनं स्ववनेगु मनस्थितिइ तइ । शनिवाः बहनीया थुगु दुर्घटनाय् नं थुपिं निम्ह अभियुक्तपिं कार सुचुका घटनास्थलया अवस्था सिइकेत वःगु खनेदत । अपराध अनुसन्धानया अनुभव नं दुम्ह इन्सपेक्टर पन्थीं थ्वहे लक्षणयात थुइवं थुपिन्त नियन्त्रणय् कयाः न्यनेकने यासेंलि निम्हं कानूनया दायरा वःगु खः ।
Categorized in अपराध